DAGHAN na ang nagpanikad sa pagpahigayon sa prestihiyoso ug dakong lumba-dagan sa nasud, ang 41st National Milo Marathon Davao leg karong Oktubre 22, manukad ug mobalik sa SM Lanang Premier ning siyudad sa Davao.
Gibutyag ni Davao race organizer Kenneth Sai, presidente sa Vantage Sports Promotions, atol sa Davao Sportswriters Association (DSA) Forum sa Annex sa SM City Davao, Huwebes, nga ang lumba-dagan sa Dominggo magsilbi nga qualifying race ang male and female 21k ug 10k categories alang sa umaabot nga national finals nga himuon sa Disyembre 3 sa Cebu City.
"The runners are not after the cash prizes but to qualify," ni Sai nga giubanan sab ni Kirk Mojica.
Luyo sa 21k ug 10k, mga partisipante mosalmot sab sa 3k ug 5k fun run.
Mga prominenteng managanay gikan Cebu City ug Bukidnon City, suma ni Sai ang milagda na aron moapil.
Anaa sab ang mga banggiitang managanay sa Davao nga sila Judelyn Miranda ug Olive Firmeza.
Dugang pa nga ang kasamtangang kampeyon sa male 21k nga si Sonny Wagdos ang dili na madepensahan ang titulo karon nga tuig tungod anaa na siya sa Air Force.
Samtang gibutyag ni Mojica nga gilauman nilang anaa sa 10,000 ka partisipante ang mosalmot, apan, malaumon silang mas modaghan pa kini, rason nga gilugwayan ang registration ngadto sa Sabado, Oktubre 20.
Luyo niini, duna say cheerleading competition sa college, High School ug elementary nga magsilbing highlights sa kalihukan uban ang adbokasiya sa Milo nga pagpanghatag og sapatos ug hope program.
Ang registration fees anaa sa P100 (estudyante 3K/5K), P150 (adults 3K/5K), P750 (10K) ug P850 (21K) apil na ang singlet ug race bib.
Ang kampeyon sa 21K mobitbit og P10,000 ug tropeyo samtang ang manguna sa 10K mobulsa og P5,000 matag usa ug medalya. Ang uban a top 10 finishers sa 21K ug 10K duna say premyo apil na ang 5K ug 3K top finishers.