ANG unang panagtagbo sa Davao City Peace Committee (DC-Peace) sa lokal nga hinabing pangkalinaw gitakda karong Oktubre 24, 2017.
Si Davao City Mayor Sara Duterte-Carpio sa pakighinabi human sa Davao City Peace and Order Council kagahapong adlawa nagkanayon nga ang Oktubre 24 maoy adlaw nga ang tanang gitudlo nga miyembro makatambong.
"Naglisud mi og gather sa mga members kay daghan sa ilaha dunay trips abroad so ang pinaka-first nga nakuha namo nga tanan sila naa sa Davao City is on October 24 in the morning," suma sa mayor.
Si Duterte-Carpio nagkanayon nga ang komitiba maghisgut unsaon paglakip sa Comprehensive Local Intergration Program (Clip) program sa Department of Interior and Local Government ug Office of the Presidential Adviser on Peace Process (Opapp) ngadto sa lokal nga hinabing pangkalinaw.
"This will be one of the things that will be discussed during the first meeting of the DC-Peace," suma ni Duterte-Carpio.
Ang unang tumong sa Clip mao ang paghatag og pinansyal nga tabang sa mga rebelde nga mitahan sa gobyerno.
Si Duterte-Carpio nagkanayon nga gawas sa Clip, ang komitiba nagkanayon nga ilang hisgutan ang usa ka tuig nga plano, samtang ang komitiba gihatagan og usa ka tuig sa mayor nga makabaton og mabungahon nga hinabing pangkalinaw tali New People's Army (NPA).
Mga sakop sa komite sila Maria Luisa Bermudo sa City Social
Services and Development Office, Atty. Elisa Lapina sa City Legal Office, Barangay Malabog chief Jessielito Areja, ug Archbishop Romulo Valles sa Simbahang Katoliko.