DAKOG pundo sa suporta kining kalihokang nga mag-federal system na ang Pilipinas aron mas makiangayon na nga mabahinbahin ang pundo sa kagamhanan ngadto sa mga rehiyon.
Lalim bay mao man kini ang unod sa kausaban nga gibandera ni Presidente Rodrigo Roa Duterte kaniadtong nagpapili pa kini alang sa pagka presidente.
Dili ko makalimot dihang nanangpit kini si Mayor Jun Evasco sa Maribojoc sa akong asawa nga molusad og mga kalihokan dinhi sa Sugbo alang sa listening tour ni Digong kaniadtong 2015.
Klaro kanako ang kalainan sa kampanya ni Digong niadtong tungora. Gusto niya iduso ang sistemang federal dinhi sa Pilipinas.
Ug klaro man nga nagkinahanglan kini og kausaban sa Konstitusyon sa Pilipinas. Gikinahanglan ang charter change kun Cha-Cha.
Sa pagkakaron man gud, naa kita sa unitary system nga nagsentro sa nasudnong kagamhanan nga nagbase sa Manila. Mao nga tungod sa gahum nga nagsentro didto sa kaulohan, atong gitawag kini og Imperial Manila.
Tuod man, di makaingon ang mga kaatbang ni Digong karon nga dunay mangil-ad nga agenda kining pagduso og charter change kay bisan wa pa siya molansar, mao na man kini ang adbokasiya sa atong presidente.
Bisan pa man, gikinahanglan gihapon ang pagpasabot kay daghan baya sab ang di uyon nianang Cha-Cha kay mahadlok sa mga isyu nga giisa batok sa pag-usab sa Konstitusyon panahon ni presidente Ramos ug Arroyo.
Nagpasalamat ko nga gisiguro daan ni Presidente Duterte nga giipaagi sa Constitutional Commission (ConCom) ang pagmugna sa draft sa bag-ong konstitusyon ug wala kini gitugyan sa mga buaya sa Kongreso.
Apan ang Kongreso gihapon, pinaagi sa pag-convert niining ngadto sa usa ka Constituent Assembly (ConAss) mao gihapon ang paagi sa pag-aprub sa maong batakang balaod sa dili pa kini isalang sa usa ka plebisito.
Atong nasabtan nga apason kon mahimo nga mahitabo ang maong plebisito dungan sa Mayo 2018 nga eleksyon sa barangay sa ingon masugdan ang transition period inig 2019 local election.
Ang ingon niini nga timetable nagkinahanglan og tinabangay sa mga tigsuporta ni Presidente Duterte. Mao kini ang panawagan si Cabinet Secretary Evasco sa miaging Lihok Suporta sa Sugbo sa miaging Oktubre 7. Gani nalipay siya nga nahimong sentro karon ang Kilusang Pagbabago sa alyansa pabor sa pederalismo dinhi sa Kabisay-an.
Ang iya lang kasagmuyo kay dunay mga giingong mga opisyal nga pabor kintahay ni Presidente Duterte nga niingong anti-Duterte daw ang maong rally.
Imbes maninguha nga magkahiusa ang mga grupong pro-Duterte, mangita hinuon og bikil subay sa agenda niini nga personal. (@anol_cebu sa Twitter)