PLANO karon sa Cebu South Bus Terminal (CSBT) nga himuon ang advance booking sa mga ticket alang sa umaabot nga kalag-kalag.
Kini nga lakang unang nasabutan sa administrasyon sa CSBT ug sa Land Transportation Office (LTO) 7.
Matod ni LTO 7 OIC regional director Alita Pulga nga nagtagbo sila ni Joy Tumulak, security operations head sa CSBT aron pagahisgutan ang maong plano.
Dugang ni Pulga nga tumong nila nga mas mominus ang linya sa panahon sa ting-uli sa publiko sa tagsa-tagsa ka mga probinsiya niini atol sa kalag-kalag.
“Because as experienced, ang nahitabo is daghan kaayo tang mga pasahero nga naa sa terminal naghulat og tibuok adlaw o tunga sa adlaw just to get a ride,” matod ni Pulga.
Dugang niini nga mamahimo na unya nga makakuha sila daan og tikket duha o tulo ka adlaw sa dili pa ang ilang adlaw sa pagbiyahe.
Gibutyag ni Tumulak nga ugmang adlawa, Lunes, makigtagbo sila ni Cebu Governor Hilario Davide III aron ma-finalize na kini.
Lakip sa ilang sabuton ang bus ug mini bus companies.
Sugod ugma hangtod Biyernes, mohimo na usab ang LTO 7 sa ilang physical inspection sa mga pambuliko nga bus ug mini bus aron masiguro ang luwas nga biyahe diin modagsa ang pasahero.
Dugang ni Pulga nga seating capacity angay usab aron luwas ang tanan nga sakay.