HILOM ang palibot, gipabagting ang kampana, mga luha ug pagyukbo ang nisugat ni Cebu Archbishop Emeritus Ricardo Cardinal Vidal sa iyang pag-abot sa Archbishop’s Palace sa dan D. Jakosalem, siyudad sa Sugbo kagahapon sa buntag.
Ang Cardinal nahibalik sa iyang kanhi pinuy-anan sud sa 28 ka tuig sa dihang arsobispo pa kini sa Sugbo.
Alas 7 sa buntag, naabot sa Archdiocesan Shrine of San Pedro Calungsod ang lawas ni Vidal luwan sa usa ka puti nga purlon nga sayo nakagikan sa Cebu Metropolitan Cathedral, alas 6:30 sa buntag.
Sa atubangan sa purlon, nagsakay si Msgr. Marnell Mejia, editor-in-chief sa Ang Bag-ong Lungsuranon ug parish priest sa Santo Niño Parish sa siyudad sa Mandaue.
Si Mejia ang “hepe de biaje” sa dihang gisuroy sa lainlaing mga lugar ang pilgrim image ni San Pedro Calungsod.
“Karon, ang among hepe na sab ang akong gibiyahe,” pamulong niini.
Usa ka solemne nga procession ang gipahigayon sud sa compound sa palasyo diin gituyok ang purlon nga giluwanan sa lungon sa Cardinal hangtod sa buhatan sa arsobispo diin nagpaabot si Arsobispo Jose Palma, kaparian, mga madre, seminarista ug mga empleyado.
Samtang nag-irog ang prosesyon padayon usab ang pagbagting sa kampana sa shrine.
Pag-abot sa ganghaan sa shrine, gikanaog ang brown nga lungon sa Cardinal ug giyayongan sa mga sakop sa San Pedro Calungsod choir ug gisunod ang pagbendisyon ni Palma.
Sa iyang pag-ampo, ang arsobispo namahayag nga symbolic ang pag-abot sa Cardinal tungod kay kagahapon gisaulog usab ang ikalima nga anibersaryo sa kanonisasyon ni Calungsod.
Si Vidal ang unang nangu sa kawsa alang sa pagkasantos ni Calungsod gikan sa beatipikasyon hangtod na sa kanonisasyon didto sa Roma niadtong Oktubre 21, 2012.
“Ang pag-adto niya sa shrine symbolic kaayo to kay gesture to sa pagpasalamat sa Cardinal sa daghang efforts nga iyang nahimo apil ang pagkasantos ni Calungsod.
Si Msgr. Ruben Labajo, pangu sa team of pastors sa Cathedral, niingon gipili nila ang lungon nga dili hayag og color ug dili kaayo mahal alang sa Cardinal base sa sugyot ni Palma.
Matod niya si Vidal deboto sa Our Lady of Mount Carmel, hinungdan nga brown nga lungon ilang gipili.