PANABO CITY, Davao del Norte - Human ang duha ka sagunsong daug niadtong Huwebes, ang Dabawenyong si Michael Accion natilawan ang unang pildi batok Bukidnon's John Bryan Otico kinsa naka-survive sa ikaduhang adlaw sa Mayor James Gamao National Invitational Championship 2017, kauban sila Leander Lazaro, Fritz Verdad ug top seed Patrick John Tierro luyo sa grabang kainit didto sa bag-ong twin courts niadtong Biyernes.
Si Accion, 21, graduating Sports Management student sa National University, natagak sa 2-1 win-loss card sa bracket B human mapakyas sa 18 anyos Otico, 4-6, 5-7 sa duwa nga miabot og duha ka oras.
Kulbahinam ang duwa gikan sa pagsugod dihang ang taga-Toril ug taga-Maramag nagkambyohay og maayo hangtud sige'g katabla nga misulay sa ilang pasensiya.
Si Fifth seed Otico, sa interbyu sa Sun.Star Davao, miingon, "Sugod first set pa lang sa serve ra mi nagdaug. Na-break nako siya once mao pod nahitabo sa second set. Kailangan jud i-pressure nako pag nag-serve siya."
Milambo ang iyang rekord, 2-1 sa group round-robin eliminations.
Samtang pildi si Otico kang Fritz Verdad, 6-4, 1-6, 9-10, niadtong Huwebes hapon.
Ang La Salle Zobel player mibasol sa iyang kapildihan tungod sa bikog iyang nabati sa duha niya ka paa apan nakabawi siya sa duwa kontra Accion dihang iyang gipahilot, miinom og vitamins ug daghan tubig.
Si Tenth seed Accion, miangkon, "Dili jud nako siya kaya kay gihimo naman nako ang tanan. Dili nako ma-break iyang serve."
Bahin kang Fourth seed Verdad, nakuha ang iyang ikatulong daug pinaagi sa pagpalukapa kang third seed Vicente Alberto "Onyok" Anasta, 3-6, 6-3 (10-7) sa parehong grupo.
Si Anasta kinsa wa makaduwa sulod lima ka bulan, nakuha ang ikatulong pildi.
Sa laing duwa, kanhi Uaap most valuable player (MVP) nga si Lazaro, 24, gipayukbo si Jan Godfrey Seno sa Bogo, Cebu, 6-4, 7-5 sa Group A sa torneyo gipresenta sa Merco ug Selecta.
Matud ni Lazaro nga ang pakigduwa kang Seno kinsa iyang gikonsidera nga isip star usa ka kusog nga kontra apan iyang gipahimuslan ang pagka-injury niini.
"Injured din kasi siya eh may advantage din ako usually kasi lagi kaming three sets at sobrang dikit. Naging disadvantage nya yong injury nya nakuha nya kay (Noel) Damian kahapon," ni Lazaro.
Ang kompetisyon gisuportahan sa Philippine Sports Commission (PSC), Engineer Glenn Olandria, Bioextend, Stronghold Insurance, Swiss Deli, Mamma Maria's by Paul Abao, Rocky's Barbershop by Timtom Gempesaw, Asiatraders, Slazenger, Dunlop, Gene Rose Tecson ug Representative Tonyboy Floirendo.