SUKAD nga nisugot si Bise Presidente Jojo Binay nga maapil sa kampanyang Noy-Bi sa piliay sa 2010 ug suportado siya sa pro-Noynoy nga grupong nalambigit sa campaign headquarters nga gitawag og Samar, makaingon kita nga apil na siya sa administrasyon.

Di man lang gud mga sakop sa Liberal Party ang naa sa administrasyon. Dugay na man kitang nakahibawo nga dunay duha ka paksyon nga gitawag og Samar ug Balay.

Ang Samar maoy nagsuporta kang Binay. Ang Balay maoy sentro sa kampanya ug sa mga kalihokang nagsuporta kang DILG Secretary Mar Roxas.

Wa magsugod ang pagsal­mot ni Binay sa administrasyon dihang nidawat siya og katungdanan sa Cabinet.

Ug sukad sa 2010, apil si Binay sa opisyal nga pamilya sa Aquino administration.

Bisan pa man og daghang mga panghitabo sulod sa administrasyon nga resulta sa giingong in-fighting tali sa duha ka paksyon, di makaingon si Binay nga wala siyay labot. Gani, way opisyal nga reklamo si Binay sa panghitabo sulod sa administrasyon. Igo ra siyang magpa-ukyab nga siya maoy mahimong anointed ni Presidente Aquino.

Mao nga bakikaw alang ka­nako kining pagsaway karon ni Binay sa administrasyon nga daw wa siya maapil sa iyang giingong “palpak” ug “manhid.”

Kon buot hunahunaon, ni­biya lang si Binay sa adminis­trasyon karong nibalitok padung kang Sen. Grace Poe ang mga nagduso sa “NoyBi” kaniadtong 2010.

Nakahinumdom man ta nga niadtong tungora si Sen. Chiz Escudero ug Sen. Serge Osmeña nalambigit sa Samar faction ug niduso sa NoyBi aron mapildi si Roxas.

Wa mobiya si Binay sa administrasyon kaniadtong dakong isyo ang PDAF ug DAP. Wa mobiya si Binay dihang nibuto ang trahedya sa Mamasapano. Wa gani siya mobiya dihang sunod-sunod gibandera diha sa Blue Ribbon sub-committee ug gisang-at sa Office of the Ombudsman ang mga akusasyon nga plunder batok kaniya.

Karon na siya nihawa nga nawad-an na siya og mga kaal­yado sa kampo ni PNoy.

Nangapriso na

Kon atong tukion pag-ayo, sayop nga moingon si Binay nga ang oposisyon lang ang gigukod sa Aquino administration sa isyong pangurakot.

Tinuod, mga haligi sa oposisyon nila si Sen. Juan Ponce Enrile, Jinggoy Estrada, ug Bong Revilla. Apan si Binay sakop baya sa Aquino administration. Siya ang suportado sa Samar faction. Sakop siya sa Cabinet, ang opisyal nga pa­mil­ya sa administrasyon.

Karong nibiya si Binay sa administrasyon, nangapriso na kining mga haligi sa oposisyon nga wa niya matabangi kay tua man siya sa kampo ni PNoy.

Ug daw siya na lang ang bakikaw nga manaway sa mga panghitabo nga apil siya sa nakaingon.

Tungod niini, makaingon ko nga matag kisi-kisi ni Binay, mosamot hinuon siya kaunlod.

Resort airport

Si Presidente Aquino ang halangdong dinapit sa groundbreaking kagahapon sa proyektong bag-ong terminal sa Mactan-Cebu International Airport. Matod pa, inig ka human sa tibuok proyekto, mahimong unang resort airport ang MCIA.

Usa kini ka multi-billion nga proyekto nga makapalambo sa ekonomiya sa Sugbo sulod sa umaabot nga katuigan labi na sa panahon sa ASEAN integration.

Proyekto kini nga nagpalapad sa ganghaan sa tunga-tu­nga nga bahin sa Pilipinas gikan ug padung sa kalibotan. Alang kanako, sayop ang pasangil nga walay proyekto ang administrasyon dinhi sa Sugbo.

Ingna lang hinuon nga usa lang kay ang ubang mga proyekto di man ingon niini kadako sama sa pagpalambo sa kadalanan.

Ug malaumon ko nga mag­malampuson kini labi na karong ang Mactan-Cebu International Airport Authority (MCIAA), ang partner sa GMR-Megawide, naa man sa liderato nilang Nigel Paul Villarete ug Ahmed Cuizon.

(@anol_cebu sa Twitter)