AMIGO. Higala diay sila ni DILG Secretary Mar Roxas ug Davao City Mayor Rodrigo “Digong” Duterte. Nagkita sila ni Secretary Roxas ug Mayor Duterte niadtong Hunyo 26 sa dakba­yan sa Davao human og hatag og walo ka patrol jeeps sa pulis sa Tagum city.

Matod pa ni Secretary Roxas nga sa ilang pagkukabildo ilang gihisgotan ang golf, pa­milya ug uban butang nga way labut ang pulitika.

Atong mahinumduman nga atubangan sa mga negosyante sa miaging semana mideklarar pag-usab si Duterte nga dili siya modagan pagka presidente tu­ngod kay 70 anyos na siya ug ang iyang anak dili mosugot.

Ang giingon ra ni Mayor Duterte nga di siya modaganpagka president. Sa ato pa, abli ang iyang pultahan sa posibilidad nga modagan siya pagka bise presidente, di ba?

Ang panagkita ni Roxas ug Duterte didto sa dakbayan sa Davao niadtong Hunyo 26 nakahatag pagduda nga basin og dunay gi-estoryahan ang duha kabahin sa pulitika. Apan si Roxas nagdumili pagsulti sa medya kon naghisgot ba sila og pulitika.

Atong mahinumduman nga si Sen.Grace Poe nagdumili og dagan pagka bise presidente ni Roxas ubos sa Libe­ral Party (LP).

Presidente ang gusto nga daganan ni Senador Poe kon modagan man siya sa piliay sa Mayo 2016 ug ang iyang gusto nga mahimo nga bise presidente mao si Sen. Chiz Escudero.

Sa akong tan-aw di na mo­dagan pa pagka bise presiden­te pa si Roxas human siya milay­lo pabor ni Presidente Aquino niadtong 2010 nga piliay ug napildi siya ni Bise Presidente Binay.

Naglungot-lungot pa gyud si Roxas nga makabawos ni BP Binay. Si BP Binay, nga bag-o lang mibiya sa kabinete, modagan gyud pagka presidente sa Mayo 2016 bisan pa sa mga kurapsyon ug plunder nga akusasyon.

Tungod sa pagdumili ni Senador Poe nga mag-bise presidente ni Mar Roxas ubos sa LP sa Mayo 2016 nga piliay posible nga gihangyo ni Roxas si Mayor Duterte nga iyang kandidatohon pagka bise presidente.

Sa survey, si Duterte nga gi­tuohan nga modagan pagka presidente naa sa ika tulo nga dapit uban nila ni kanhi presidente Erap Estrada. Gani, mas taas pa og grado sa survey si Duterte ni Roxas.

Alang kanako usa ka dakong garbo sa mga bisaya, labina sa Visayas ug Mindanao, kon magkuyog si Roxas ug Duterte unya modaug pa gyud nga presidente ug bise presidente sa Mayo 2016 nga piliay.

Ang dako nga pangutana, mahitabo ba nga magkuyog si Roxas ug Duterte nga kandidato sa LP pagka presidente ug bise presidente sa Mayo 2016 nga piliay? Atong subaybayan.

****

AIRPORT. Ugma pormal nga ilusad ang pagsugod sa trabaho sa itukod nga bag-o nga terminal sa Macta-Cebu International Airport (MCIA), Lapu-Lapu City ka­gahapon nga mobalor og P17.5 bilyunes.

Si Pres. Noynoy Aquino, inubanan sa opisyales sa Department of Transportation and Communication (DOTC) ug ang kontraktor sa airport GMR-Megawide Cebu Airport Corporation (GMCAC), ang nag-una sa groundbreaking.

Matod pa ni DOTC Sec. Joseph Emilio Abaya usa ka “world’s first resort airport” ang MCIA unya igkahuman niini. Mao ni primero nga airport ubos sa public-private partnership project sa kagamhanan ni PNoy.

Gitarget nga mahuman ang maong proyekto sa Pebrero 2018. Ang pag-usab sa daan nga terminal mahuman sa 2019.

Padak-an ang gidak-on sa terminal nga makasulod og 12.6 milyunes ka pasahero matag tuig gikan sa 4.5 mil­yunes. P14.40 bilyunes ang gi-bid sa GMCAC, nga pinakataas sa tanan mga bidder.

Nadilatar og lima ka buwan ang pagsugod sa trabaho sa terminal tungod kay nalangay ang pagbalhin sa mga opisina sa Air Force nga maapektohan sa pagpalapad sa airport terminal.

Sa mga nagbiyahe sa eroplano nga moagi sa MCIA nakakita na sa mag kausaban nga gibuhat sa GMCAC aron madali ang pagsulod sa mga pasahero nga mobiyaye. Maayo unta og way lain kakulian nga masugatan sa kontraktor.

(freezone.ellie588@gmail.com)