DAVAO DEL SUR -- Subling giduso sa mga mayores sa 10 ka mga lungsod sa Davao del Sur ang resolusyon aron mohimo ang Kongreso og balaod nga butangan og ikaduhang distrito ang lalawigan.
Gibutyag sa pamuno sa League of Municipalities of the Philippines (LMP) ug Hagonoy Mayor Conrado Laza nga giuyonan sa sa laing siyam ka mga mayores ang pagduso nila sa maong resolusyon ngadto sa hawanan sa Kongreso.
Unang nang giduso sa mga mayores ang unang resolusyon niadtong Marso 2015 didto sa Kongreso apan wa kini matagad dihang namuno pa si kanhi House Speaker Feliciano Belmonte.
Ning taknaa, gidason sa mga mayores nga nanghinaot silang suportahan ni Presidente Rodrigo Duterte ang ilang tumong.
Gitataw ni Magsaysay Mayor Arthur Davin nga mas paspas nga kalambuan ang maangkon sa lalawigan ugaling mabutangan og kaugalingong opisyal ang ilang distrito.
Aduna nay mga opisyal sa Sangguniang Panlalawigan ang ikaduhang distrito mao nga gitataw ni Kiblawan Mayor Jason Rama nga angayan lamang nga mabutangan sab kini og representante sa Kongreso.
Sa kasamtangan, usa lang ka Congressional District ang Davao del Sur nga gi-representahan ni Rep. Mercedez Cagas apan nanghinaut ang mga mayores nga suportahan sa opisyal ang ilang kawsa.
Bisan si Digos City Mayor Joseph Peñas nagbutyag nga mas nindot ang tumong sa iyang mga kaubanang mayor ilabi pa nga daghang katawhan ang maka-benepisyo sa paspas nga kalambuan sa taliabot nga panahon.
Gihimong rason sa mga mayores ang pagbutang og ikaduhang Congressional district ang mandato sa konstitusyon nga angayang aduna lamay 250 mil ka populasyon ang usa ka legislative district.
Subay sa datos sa 2015 census sa Philippine Statistics Authority adunay 320,820 ang populasyon sa unang distrito ug 311,768 sa ikaduhang distrito ang Davao del Sur.
Sakop sa unang distrito ang mga lungsod sa Sta. Cruz, Bansalan ug dakbayan sa Digos samtang mga lungsod sa Magsaysay, Matanao, Hagonoy, Padada, Kiblawan, Sulop ug Malalag ang ikaduhang distrito ug adunay 232 ka mga barangay sa lukop lalawigan.
Naghinaot karon ang mga mayores ug sama sa pag-uyon sa bagang duot sa katawhan nga mibulag ang kanhi segundo distrito nga karon Davao Occidental, tugtan sab niini ang pagbutang og bag-ong opisyal pinaagi sa plebisito ugaling mahimo na kining balaod. (OBD)