ARON mahunong na kuno kanang pagkuwestiyon sa mga sakop sa Bando Osmena Pundok Kauswagan (BOPK) labi pa ni Konsihal Sisinio “Bebs” Andales kabahin sa pag-solicit og mineral water ni Mayor Mike Rama aron iyang ipa-inum sa manambong sa iyang State of the City Address (Soca) ugma, andam nga mo-donate og 7,000 bottled water si kanhi konsehal Ernesto “Pretty Boy” Elizondo. Nagkita kami ni Elizondo niadtong miaging semana atol sa induction sa Cebu Toastmaster’s Club sa Casino Espanol ug iya kong giingnan nga ipahibalo nga andam siyang mo-donate og 7,000 bottles of water. Matod ni Elizondo nga wala mo-solicit o mangayo si Mayor Mike kaniya kon dili iyang kaugalingong kabubut-on ang pag-donar.
Una, niini gikuwestiyon ni Konsehal Andales ang gihimong pag-solicit ni Mike pinaagi sa iyang secretary Belinda Navascues. Hinuon, walay pirma si Mike sa maong solicitation letter ug mihimakak usab si Navascues nga iya kadtong pirma sa ubos nga “by authority of the mayor.” Adunay susamang solicitation letter nga nangayo usab og pan sa usa ka bakery aron ipakaon niadtong pagselebrar sa Independence Day. Hinuon, wala moreklamo ang tag-iya sa kompaniya sa mineral water ug bakery kon dili si Andales lang ang magsige og yaw-yaw niini.
Republic Act 6713
Klaro ug tataw sa Section 7 sa Repubic Act 6713 o Code of Conduct and Ethical Standards for Public Officials and Employees nga ginadili ang pag-solicit o pagpangayo ingon man pagdawat og mga regalo gikan sa ubang mga tawo gawas sa kabanay sa government employee bisan sa panahon sa iyang birthday ug Pasko.Nakasupak ba si Mike niini o ang iyang secretary? Aw, klaro man kana sa balaod. Busa akong gihagit si Andales sa pagpasaka og kaso batok ni Mike ug sa secretary niini kay sa magsige og yaw-yaw. Peromakapanghunaw si Mike ani kay wala man siyay pirma. Pero kon siya man gyud ang nagsugo sa iyang secretary malooy pod siya uy. Himoon lang niyang shock absorber. Pero maayo na lang gani ning kang Mayor Rama kay solicitation o pangayo lang. Dihay usa ka opisyal niadto nga adunay duha ka nga imported cars nga gi-donate para sa siyudad, gigamit man personal sa maong opisyal. Sa dihang nabuking sa media, napalit naman kuno sa iyang igsoon ug pag-umangkon ang maong nga sakyanan. Misteryo no?
Kinsay wa modawat?
Pero dili na lang unta ba mag-ipokrito kining mga pulitiko. Kinsa ba ninyo ang wala modawat og regalo kon mag-birthday mo o panahon sa pasko? Magbaha man gani nang lechon ug bino panahon sa inyong birthday. Kinsa ninyo ang wala modawat og kickbacks ug commission gikan sa mga kontraktor sa mga government projects?
Magpalimpiyo-limpiyo ning ubang mga pulitiko pero otro pod nga hugaw.
(bobby.nalzaro@yahoo.com)