DAKONG uyon si Pangulong Rodrigo Duterte sa hisgutanang same-sex marriage, butang nga naghudyaka ang Lesbian, Gay, Bisexual, and Transgender (LGBT) community atol sa 7th LGBT Davao Year-end Party nga natigayon sa The Tent, Azuela Cove, Lanang, Davao City, niadtong Dominggo.
Ang pangulo nagpasabot sa iyang bahin nga uyon siya niini, apan ang problema gikinahanglan nga usabon una sa pagpanday ang kasamtangan nga balaod.
"Ako gusto ko 'yung same-sex marriage. Ang problema, we will have to change the law. But we can change the law. I don't have a problem with man marrying a man," sulti sa pangulo.
Ang nahitabo karon, maingon ba nga usa kini ka indikasyon nga ang administrasyong Duterte motan-aw gayud sa panginahanglan sa katawhan di lamang sa pisikal nga aspeto kundi ngadto sab sa emosyonal?
Emosyonal kung matawag ang maong pagsuporta gumikan dayag gayud ang kalipay sa LGBT community kung mahitabo ang same-sex marriage diri sa nasud nga gikonsiderang usa sa mga midominar sa Kristiyanismong tinuhoan nga supak sa maong hisgutanan.
Apan depensa sa LGBT community nga mas mabati pa ang tiunay nga gugma sa panag-uban sa maong komunidad itandi sa pipila ka babaye ug lalaki nga giusa sa altar sa kaminyuon, apan misangko sa panagbulag.
Ang maong hisgutanan, dugay sab nga gilantugian didto sa kasadpang bahin sa Europa, Australia ug sa Amerika una kini na-legal sa ilang dapit, diin sama ang ilang naagian niadto sa naagian karon sa Pilipinas.
Kung di man mahitabo sa Pilipinas ang same-sex marriage, nangindahay nalang ang LGBT community nga irespeto ang same-sex relationship diha sa patas nga pagtan-aw niini sa katilingban.