Cardinal Vidal pagka santos?

GUMIKAN sa mga testimonya sa daghang maa­yong mga binuhatan ug emosyonal nga pagdayeg, nitumaw ang hisgutanan bahin sa po­sibilidad pagpabayaw sa pagkabeato hangtod padung sa pagka­santos kang Cebu Archbi­shop Emeritus Ricardo Cardinal Vidal.

Apan si Cebu Archbishop Jose Palma namahayag nga samtang nagtuo siya sa pagkabalaan sa Cardinal alang niya angay nga motutok una sa gihimo nga paningkamot karon aron mabayaw sa pagkasantos si anhing arsobispo Teofilo Camomot.

“Para nako seguro, let’s do it one at a time, naa pa si Camomot pa...Moingon ang Roma, wa pa gani kamo kahuman kay Camomot. Let’s focus first on Camomot,” matod ni Palma ngadto sa mga tigbalita.

Sa kadaghan sa mga tawo nga natabangan ni Vidal isip alagad sa Diyos ug nakasinati sa iyang kaayo labi na kini ang tigpataliwa sa nagkasungi nga mga pulitiko, dunay mga nipatim-aw sa posibilidad nga angay mahimo nga santos ang namatay nga Cardinal.

Ang iyang maayo nga mga buhat nasayran base sa mga testimonya sa mga tawo nga natabangan niya nga nipaambit sa ilang tagsatagsa ka sugi­lanon nga ilang nasinati sa dihang buhi pa ang 86-anyos nga Cardinal.

Sa dihang buhi pa si Vidal, pi­pila ka mga higayon nga nahi­mamat niini ang mga santos na karon nga sila si Saint John Paul II ug Saint Teresa of Calcutta.

Niadtong Mayo 25, 1985, gitudlo ni Saint John Paul II, santo papa niadtong higa­yona, si Vidal isip cardinal sa simbahang Katoliko sa nasod.

Ang santos nga Santo Papa unang nitudlo niini isip Coadjutor Archbishop sa Sugbo niadtong 1981 ug dayon arsobispo niadtong Agusto 24, 1982, puli ni Cardinal Julio Rosales.

Si Vidal nakadawat sa labing taas nga award gikan sa ka­gamhanan sa lalawigan sa Sugbo, ang Order of Lapu-Lapu.

Niadtong Disyembre 2010, siya giila sa nasudnong gobiyerno pinaagi sa Senate Resolution 306 ug House Re­solution 593, gumikan sa iyang serbisyo sa katawhan sa Sugbo pinaagi sa iyang spiritual leadership ug nagsilbi nga inspirasyon sa uban.

Si Vidal gihimo usab nga “adopted son” sa kagamhanan sa siyudad sa Sugbo ug dakbayan sa Talisay ug nakadawat sa titulo nga Doctor of Humanities honoris causa gikan sa University of the Visayas niadtong Marso 2009.

Samtang, motudlo og papal legate si Pope Francis isip maoy morepresentar niini sa paglubong ni Vidal karong Huwebes.

Si Msgr. Joseph Tan, tigpa­maba sa artsidyosesis sa Sugbo, nikompirmar nga nakadawat sila og kasayuran bahin sa appointment sa papal legate sa miaging semana.

Matod niya ang papal legate mahimong gikan sa buhi nga mga Filipino cardinals sama nila ni Manila Archbishop Luis Antonio Cardinal Tagle ug Cotabato Archbishop Orlando Cardinal Quevedo.

Ang mga cardinal nga gikan sa laing mga nasod nga duol sa Pilipinas mahimo usab itudlo nga Papal Legate atol sa lubong, dugang ni Tan.

Atol sa 51st International Eucharistic Congress niadtong 2016, si Myanmar Archbishop Charles Maung Cardinal Bo ang nirepresentar ni Pope Francis isip iyang Papal Legate.

Si Vidal ilubong sa mauso­leum sa Cebu Metropolitan Cathedral, nga natukod sa panahon ni anhing Arsobispo Julio Cardinal Rosales.

Si Tan nidugang nga si Tagle ug Manila Archbishop Emeritus Gaudencio Cardinal Rosales moduaw sa haya ni Vidal karong Miyerkules.

Sa pagkakaron, nagpada­yon ang linya sa mga tawo nga buot moyukbo sa haya sa buotang Cardinal sa Cebu Metropolitan Cathedral sa downtown sa dakbayan sa Sugbo.