Dear Noy Kulas,
Ako si Neneng, nia sa gawas nagtrabaho. Ang akong problema mao ang akong pamilya. Mga tulo na ko ka tuig diri nagtrabaho sa gawas. Nagsugod ang problema nga six months na dihang akong nahibaw-an nga dunay laing babaye ang akong bana.
Ako siyang gi-confront apan pwerte niyang deny sa estorya nga bisan iyang pamilya maoy naghatod nako sa balita. Sukad niadto, tagsa na lang mi magkaestorya kay amo mang mahisgutan ang mao nga estorya kay di ko makalikay tungod sa akong kasuko.
Karon duna koy nakaila sa social media nga usa ka lalake nga minyo pero buwag sa asawa. Ganahan ko niya kay caring ug honest siya diri nako. Naa siya sa Pilipinas nagtrabaho. Siya ang nag-atiman sa iyang mga anak human siya biyai sa iyang asawa.
Nakahuna-huna ko sa pag file og annulment sa pag-uli nako sa Pilipinas. Husto ba kaha ning akong nahuna-hunaan? Pila may gasto sa pag-file og annulment?
NENENG
Neng,
Una, ayaw himoang komplikado ang imong problema. Naa pa man kay problema sa imong bana, unaha na pagsulbad kay sa magmugna ka og laing problema. Unyag uli nimo, pag-estorya mo sa imong bana kabahin sa problema tungod kay duna moy pamilya. Kinahanglan nga una nimong prayoridad ang imong pamilya, di ang pagpangitag laing lalake. Nianha ka sa abroad alang sa maayong kaugmaon sa imong pamilya. Kay kana man ang imongb tumong, mao ni ang imong unahon sa pagsalbar.
Nganong mo-file ka man og annulment nga wa pa gani nimo maklaro ang tanan, kon tinuod ba o palakaw lang ang tanan. Kay basin baya ang iyang pamilya nagmugna-mugna lang aron mo magkabuwag. Naay mga hitabo nga ang nakaingon ang mga pamilya ra sab sa two parties.
Di sayon ang pag-file og annulment kay taas ang proseso. Gawas sa taas nga proseso, dako pa og gasto. Kapin sa P100,000 ang imong gastuhon.Tungason ang annulment.
Unsa na may imong kalainan sa imong bana kon ikaw naay uyab karon? Wa na moy kalainan kamong duha. Okay ra diay ka nga pareho ra mong duha? Kon duna moy anak, pagkaluoy sa mga bata. Kana maoy huna-hunaag maayo.
NOY KULAS
(Alang sa imong problema, e-mail sa kulassuper@sunstar.com.ph ug rojval69@yahoo.com)