“WAY dakong butang nga wa magsugod sa gamay.”

Kini ang nahimong gabay ni Francisco de Gracia Jr. nga nagsugod sa pagpaninda og isda ug ice hangtod nga nahimo nga usa ka malampuson nga negosyante sa dakbayan sa Sugbo.

Bata pa lang si Francisco o naila usab sa ngalan nga Jun, ang pagpaninda na og isda ang nahimo nga panginabuhian sa iyang pamilya.

Nagdako sa Barangay Pasil, si Jun nitabang sa iyang mga ginikanan pagpaninda og isda hangtod nga nahimo na usab kini nga panginabuhian sa iyang kaugalingong nga pamilya dihang siya naminyo.

Ang 49 anyos nga amahan niangkon sa sinugdanan naglisod sila sa iyang asawa nga si Bernardita, 48, apan sa paglabay sa mga adlaw nasuhito na siya sa pagpadagan sa iyang patigayon.

Ang ilang paagi sa negosyo, paliton nila ang mga isda nga gikan sa Mindanao nga ihandos sa Pasil Fish Market ug sila na ang mobaligya niini ngadto sa mga lab-asera.

“Nindot siya nga klase sa negosyo basta naay daghang supplier og isda ug kanang kugihan lang sad ka,” asoy ni Jun sa Sun.Star Superbalita.

Gawas sa isda, namaligya usab sila og dagkong mga ice nga maoy ibutang sa isda aron dili daling madubok.

Tungod sa ilang negosyo, napalampos og tungha sa magtiayong de Gracia ang kamaguwangan nilang anak nga si Phoebe Ann, 25, nga usa na ka nars; ingon man ang ikaduhang anak nga si Frances Louraine, 23, gradwado sa kursong Tourism ug karon anaa nagtrabaho sa buhatan ni Cebu City Vice Mayor Edgardo Labella.

Ang ilang ikatulong anak nga si Joanna Ritz, 17, nagtungha sa kursong Hotel and Restaurant Management sa University of San Carlos.

Gawas sa pagpaninda og isda ug ice, si Jun nisuway og laing patigayon nga mao ang pagpamaligya og lechon buntog ug ang pagpamuhi niini.

Kapin sa 5,000 ka mga buntog ang ilang gibuhi karon sa farm nga gipanag-iya sa pamilya ug 1,000 niini ang mahimo nang maihaw.

Matod ni Jun taas ug lisod ang proseso sa pagbuhi og mga buntog, apil niini kinahanglan nga dili saba ang lugar diin buhion ang maong mga klase sa langgam ug dili huot ang lugar.

Ang mga iti sa mga buntog ilang hipuson, ibuwad ug gihimong fertilizer.

Pinaagi sa iyang higala nga si Andrew Quiñones, nagkasabot sila nga mag-partner og negosyo diin si Andrew maoy mopalit sa ilang binuhing mga buntog, timplahan ug i-marinate samtang sila na ang molechon ug mobaligya niini sa kan-anan nga bag-o lang gibuksan sa pamilya sa Food Strip sa Cebu South Coastal Road, Barangay San Roque, dakbayan sa Talisay.

Ang lechon buntog ang usa sa mga specialty sa ilang kan-anan nga kanunay gibalikbalikan sa ilang mga suki nga kustomer.

Si Jun nipaambit nga kadaghanan sa ilang mga kustomer nga nakatilaw sa lechon buntog mosulti nga mas lami kini kon itandi sa native chicken.

Matag stick nga adunay tulo kabuok buntog, gibaligya nila sa tag P150.

Nagtinguha ang ilang pamilya nga mapalambo pa ang ilang negosyo sa pagpamuhi og buntog ug pagbaligya og lechon buntog.

Gani, nagplano sila nga mohimo og dugang menu pinaagi sa buntog sama sa deep fry spicy buntog, siomai with quail egg, ngohiong quiakyo ug quail egg with pickles.

Daghan na usab ang nipadayag og interes nga mokuha og franchise sa ilang lechon buntog sa mga kan-anan sa Larsian ug Capitol Site sa dakbayan sa Sugbo ug siyudad sa Naga.

Si Jun nidasig sa nagplano mosulod og negosyo nga dili mahadlok mosuway tungod kay matod niya ang tanan nagsugod sa gamay.

“Magsugod gyud ta sa ga­may kay tanan niagi sa pagkagamay. Asa man magsugod ang dako, sa gamay man,” panapos nga pahayag ni Jun dungan sa pag-ingon nga salig ug mag-ampo usab sa Ginoo aron molampos ang negosyo.