SI Ricardo Cardinal Vidal, wa man siya matawo sa Sugbo, apan gidawat na siya kanatong mga Sugboanon nga sama sa usa ka lumad nga taga Sugbo.
Gawas sa iyang pagsilbi sa mga Sugboanon isip atong Pastor, siya usab ang lig-ong tingog nga Sugboanon sa mga mahinungdanong mga isyu sa nasud.
Mao nga di kahibudngan nga bisan si Presidente Rodrigo Roa Duterte moanhi gyud sa Sugbo bisan man lang og kadiyot aron moyukbo ug mopakita og pagtahud sa usa ka cardinal nga Sugboanon.
Gikataho nga taud-taud sab hinuon nga naghulat ang mga taga Simbahan sa Sugbo pinangulohan ni Arsobispo Jose Palma diha sa Cebu Metropolitan Cathedral. Naabot si Presidente Duterte pasado na alas dose sa gabii.
Matod pa, uyon si Digong nga himuong usa ka holiday sa Sugbo ang adlaw nga ilubong si Cardinal Vidal karong Oktubre 26, 2018.
Sa akong tan-aw, kining pagbisita ni Digong agi sab ni og pagtahud sa mga Sugboanon nga duol sa kasing-kasing niining presidente nga sa una pa sa wala siya molansar nagsigi na og hisgot niining kalamboan sa mga lalawigan pinaagi sa federalism.
Di siya kinahanglang molitok niini. Apan makita nato ang iyang pagmahal sa Sugbo.
Angat probinsya
Mao sab tingale nga giduso karon sa usa niya ka kasaligang kongresista nga maoy nagdumala sa Committee on Appropriations ang adbokasiya nga “Angat Probinsya.”
Akong nasabtan nga alang kang Kong. Karlo Nograles, ang paghatag og mas dakong pundo alang sa mga proyekto sa mga lalawigan mao ang angayang mahitabo aron mabaliktad ang sistema diin mas dakong pundo ang maadto sa kaulohan.
Dinhi sa miaging semana kini si Nograles ug nakigkita sa pipila ka sakop sa media. Usa sa iyang gihisgutan mao ang panginahanglan sa pederalismo nga maoy giduso karon ni Presidente Duterte.
Dugay na man kining maong kahimtang nga ginganlan nato og Imperial Manila. Ug kining pederalismo maoy makapausab niini.
Apan samtang nagduso si Nograles niining kausaban sa Batakang Balaod, iya sab giduso karon kining adbokasiya nga bisan pa man sa di makiangayong sistema, makahatag siya og mas dakong kahigayonan alang sa kalambuan sa mga lalawigan.
Wa ko makatambong sa maong forum uban kang Nograles apan nakauyon ako sa akong nadunggan kabahin sa iyang mensahe. (@anol_cebu sa Twitter)