NANGAYO og pasaylo ang kadagkoan sa usa ka pribadong ospital sa pagbalibad kang PO3 David Naraja, Jr. nga ma-admit kung dili makahatag ug P10,000 nga down payment sa dihang napusilan kini sa giilang hitman sa siyudad sa Talisay nga si Jessie Largo.
Matod ni Chief Supt. Jose Mario Espino, sa maong suwat, nangayo og pasaylo ang tagdumala sa Chong Hua Hospital sa gihimo sa ilang trabahante ug ilang gipasalig nga dili na kini masubli kung adunay mga pulis nga madangat sa ilang tambalanan.
Bisan pa man niini, giduso na ni Espino sa iyang PNP Legal Division ug ang maong buhatan na ang motubag kung ipadayon pa ba nila ang pagpasaka og reklamo ngadto sa korte.
Sa unod sa suwat mihangyo kini nga makigtagbo kaniya ang kadagkoan sa tambalanan aron dunggon ang habig sa kapulisan alang sa pagpadayon sa maayong relasyon nga una nang nasugdan sa Police Regional Office (PRO) 7.
Gipasalig sa heneral nga bukas ang iyang buhatan sa pakig pulong dungan sa awhag niini nga dili na sublion ang paglisudlisod sa mga pulis ilabi na kung emergency ang mahitabo sanglit andam man nga mobayad ang kapulisan.
Si Espino nihangyo sa mga tagdumala sa ospital nga dawaton ang mga pulis nga naa sa emerhensiya gikan sa ilang pag-alagad sa publiko.
Human sa dili maayong kasinatian nga nasugatan ang PRO 7 sa maong tambalanan, nitanyag na ang Cebu Doctors’ Hospital nga andam sila nga moatiman sa mga police nga dili mangayo og down payment.
Tungod niini, gimandoan ni Gen. Espino si Sr. Supt. Renato Dugan, hepe sa Police Community Relation nga mohimo og memorandum of agreement sa maong tambalanan.
Mimando iya nga kung dunay pulis nga maangol sa operation adto na nila dalhon sa Cebu Doctors’ Hospital.
Human sa agbalibad sa Chong Hua nga ma-admit si PO3 Naraja gibalhin dayon sa PRO-7 ang ilang pasyente sa Cebu Doc ug kini na ang mipasalig nga libre ang pagpatambal sa pulis lakip na ang pagpaopera sa nawong nga naigo sa pagpusil kaniya.