TULO ka cardinals ug 20 ka mga obispo ang kompirmadong motambong sa lubong ni Cebu Archbishop Emeritus Ricardo Cardinal Vidal karong Huwebes sa mausoleum sa Cebu Metropolitan Cathedral, siyudad sa Sugbo.
Sayo kagabii, si Presidente Rodrigo Duterte nilagda na og kamandoan sa pagdeklarar og special non-working holiday sa tibuok Sugbo sa Oktubre 26, Huwebes.
Human gipahibawo ni Duterte bahin sa holiday sa Sugbo sa paglubong Vidal, ang kagamhanan sa dakbayan sa Sugbo gikatakda nga mopakatap og igong kawanialang sa posible nga pagdagsa sa mga tawo sa Cathedral sa katapusang adlaw sa haya sa Cardinal.
Si Gob. Hilario Davide III maoy unang nipadala og suwat sa kang Duterte pinaagi sa buhatan ni Presidential Assistant for the Visayas Michael Dino sa naasoy nga katuyoan ug gihangop sa gobernador ang pagsuporta sa Malacañang.
Si Msgr. Joseph Tan, tigpamaba sa Artsidyosesis sa Sugbo, nibutyag nga kompirmado nga motambong sa lubong sila si Manila Archbishop Luis Antonio Cardinal Tagle, Manila Archbishop Emeritus Gaudencio Cardinal Rosales ug Cotabato Archbishop Orlando Cardinal Quevedo.
Mga miyembro sa Catholic Bishops Conference of the Philippines nga pangulohan sa bag-ong napili nga presidente, Davao Archbishop Romulo Valles, ang motambong usab ingon man ang kaparian gikan sa diyosesis sa Lucena, Quezon; Lipa, Batangas; Malolos, Bulacan; ug Marinduque.
Ang bag-ong natudlo nga Apostolic Nuncio to the Philippines, Archbishop Gabriele Giordano Caccia, dili makatambong kay tua sa gawas sa nasod, ug kini representahan sa iyang secretary, Msgr. Gabriel Viola, nga maoy mobasa sa iyang mensahe.
Duterte mibisita
Si Duterte nihulagway ni Vidal nga “person of peace” sa iyang pakigpulong atubangan nila ni Cebu Archbishop Jose Palma, kaparian ug kabanay sa namatay nga arsobispo.
“Ang iyang language has always something of murag ga-spread og gugma pirme, dili mangasaba,” pamulong ni Duterte.
Naabot ang presidente alas 12:04 sa tungang gabii gikan nitambong og Masskara Festival sa siyudad sa Bacolod.
Sa iyang pag-abot, iyang giduol ang manghod ni Vidal nga si Juanito, kinsa naglingkod sa wheelchair ug dayong duol sa lungon sa Cardinal ug nag-ampo sud sa dos minutos.
Sa iyang pakigpulong, si Duterte nangayo og pasaylo nga wa dayon siya makaduaw sa haya ni Vidal tungod sa kadaghan sa gimbuhaton.
Katapusan niyang nakit-an ang Cardinal dihang nibisita kini niya sa Malacañang sa miaging tuig.
“Mao nang nia ko kay una, ako nang obligasyon bilang miyembro sa relihiyon nga Katoliko. Ikaduha, importante pud magpakita ko ninyo bilang Cebuano, unya inyong Presidente,” dugang niya.
Si Palma nagpasalamat ni Duterte sa pagbisita sa haya ni Vidal ug niingon nga dako og kahulogan ang pagdeklarar unya og holiday sa Huwebes kay makahigayon ang mga tawo paghatag sa ilang pagyukbo sa kataposang higayon sa Cardinal. (Dugang ta AZDL)