PANABO CITY, Davao del Norte -- Bisan kusog ang ulan, rason nga na-delatar ang duwa, apan wala kini nakapugong kang top seed Patrick John Tierro aron mokampeyon sa Mayor James Gamao National Invitational Championship 2017 niadtong Dominggo sa gabii sa twin courts dinhi.
Si Tierro gikan Subic, ang beteranong Davis Cup ug miyembro sa national tennis team, misalig sa iyang eksperensya aron mapildi ang kanhi University Athletic Association of the Philippines (Uaap) most valuable player (MVP) Fritz Verdad, 6-3, 7-5, sa kulbahinam nga duwa diin miabot og duha ka oras hinungdan sa grabeng kakapoy sa duruha.
"Third match ko na today pagod narin talaga," pahayag ni Tierro sa pakighinabi sa Sun.Star Davao human sa duwa.
Ang kadaugan, maoy ikaduhang titulo ni Tierro sa singles event sa kompetisyon sa ikaunom nga edisyon nga gipresenta sa Selecta ug Merco.
Ang milabay nga lima ka edition gihimo sa Davao diin si Tierro maoy misungkit sa unang titulo niadtong 2014.
Sayo niini, milamang siya sa unang set, 4-1 pinaagi sa iyang serve aces hinungdan nga wala makasugat ang 23-anyos nga si Verdad.
Si Verdad misulay nga makabawi diin napaduol niya ang puntos, 3-5, apan si Tierro mibalos sab og kusog nga serves aron masiguro nga makuha ang unang set.
Sa bahin ni Verdad, nakabawi siya sa ikaduhang set, ug nakuha ang 4-1 nga lamang pinaagi sa iyang kusog nga backhand ug top spins apan si Tierro mibawos na sab ug mas gipakusgan ang iyang "service" aron motabla ang duwa sa 4-all.
Si Verdad naningkamot nga magpabiling buhi ug mailog ang lamang, 5-4, apan wala nagpabawos si Tierro hangtud nakuha ang kadaugan.
Matod ni Tierro, "I like the fast court kasi, gusto ko yu. Gusto ko yung ganito isang break lang and I capitalized on my break."
Nakadawat og premyong kuwarta P30,000 si Tierro samtang P20,000 si Verdad ug tagsa-tagsa ka tropeyo.