WA makaagwanta sa sakit nga tuberculosis (TB), lolo naghikot sa liog dayong ambak gikan sa punoan sa mansinetas, patay na nga napalgan kagahapon sa alas 5:00 sa buntag sa Barangay Upper Bagacay, lungsud sa Sibonga.

Si Loreto Lumales, 63, minyo, ug mag-uuma, patay na nga napalgan sa iyang asawa nga si Teodora, 63, nga nagbitay sa puno-an sa mansinetas likod sa ilang panimalay.

Si PO3 Ederlino Bacusmo, imbestigador sa Sibonga Police Station nga nahinabi sa Sun.Star Superbalita, nagkanayon ang asawa nga si Teodora didto kini matulog sa panimalay sa ilang anak.

Sayo kagahapon sa buntag, niuli siya pero nakugang nalang siya kay maoy nisugat sa iyang duha ka mata nga nagbitay ang iyang bana sa punoan sa mansenitas.

Tungod niini, nanawag siya sa iyang mga anak, kabanay mga silingan, gireport sa kapulisan ang insdente una pa nakuha ang patayng lawas niini.

Si PO3 Bacusmo niingon nga walay foul play ang kamatayon mismo ang asawa mitug-an nga naguol ang iyang bana, tagsa nalang mokaon tungod sa sakit niini.