PATAY ang usa ka ex-convict human kini gipusil gikan nga natulog sa daplin sa dalan o pasado alas 5:00 kagahapon sa kaadlawon duol sa taytayan sa dalan Sanciangko ug Tabo-an, dakbayan sa Sugbo.
Ang biktima giila nga si Alfredo Nunez, 39, way klarong trabaho ug pinuy-anan, bag-o pang nakagawas sa bilanggoan tungod sa drugas.
Sa pasiuna nga imbestigasyon gihimo ni SPO4 Alex Dacua sa Homicide Section nagbutyag nga natulog ang biktima uban sa iyang kaipon nga si Mirasol Dosdos daplin sa dalan sa dihang naabot ang usa ka tawo nga naghukas ug nangita sa biktima.
Sa dihang nakamata ang biktima, nibangon ug niuban sa maong tawo nga nangita kaniya ug nisunod si Dosdos.
Samtang sila naglakaw, nag-una ang biktima ug ang wala mailhing tawo ug nidistansiya sa pagsunod si Dosdos apan wa magdugay, nadungog na lang niya ang sunodsunod nga buto.
Si Nunez napalgan nga nabad-ay daplin sa dalan nga may duha ka samad pinusilan sa iyang ulo.
Samtang, wa na igkita ang tawo nga gikauban sa biktima sa wa pa ang hitabo.
Sa laing bahin, nadangat sa tambalanan ang usa ka tawo human kini gipusil sa kaipon sa iyang igsuon, pasado alas 4:00 sa milabayng hapon sa Sityo Tugasan, Barangay Guadalupe, siyudad sa Sugbo.
Nagsugod ang ilang away human misuway unta sa pagpangutang ang biktima, apan gibalibaran sa suspek.
Samdan sa nagkadaiyang parte sa lawas si Jeymar Dikit, 22, ulitawo ug nagpuyo sa lugar ug way trabaho.
Ang gitumbok nga nagpusil mao si Cristopher Aranas nga iya ra usab nga silingan.
Sa pasiuna nga inbestigasyon nasayran gikan ni PO1 Reuful Adalim ug mga kaubanan sa Homicide Section nagbutyag nga nagkallais ang biktima ug ang suspetsado sulod sa panimalay sa suspek.
Gisulong sa biktima ang suspek human siya makadungog og istorya nga kini maoy nibabag sa iyang igsuon nga pahuwamon siya ug kwarta.
Sa tanto nilang lalis, naabut ang ilang amahan ug nauwang, apan sa dihang milakaw na ang biktima, gisundan kini sa suspek ug dayong gipusil makalima ka higayon sa nagkadaiyang parte sa iyang lawas.
Ang suspek daling nisibat palayo sa lugar ug wala na maabti pa sa niresponding kapolisan.