USA ka lahi ug talagsahon nga presentasyon ang mapaabot sa katawhang Sugbuanon atol sa ikalima nga State of the City Address (Soca) ni Cebu City Mayor Michael Rama karong Hulyo 4.

Ang Soca ni Rama adto ipahigayon sa Plaza Independencia nga giingong tambungan sa libuan ka mga dumadapig sa Team Rama ug mga kawani sa City Hall.

Gipasabot sa mayor nga dili Hulyo 1 ang iyang Soca, sukwahi sa nangagi niyang paghatag og subay sa kahimtang sa dakbayan inay sa Hulyo 4, sanglit ang maong petsa maoy orihinal nga kasumaran diin nakabaton og kawagasan ang Pilipinas gikan sa mga kamot sa Amerikano.

Si Rama wala na nibutyag kon unsay mga unod sa iyang isaysay sa katawhan karong adlaw nga Sabado uban sa pagbutyag nga talagsaon ang maong matang sa Soca nga wala pa niya mabuhat kaniadto.

Posibleng imbitaron ni Rama si Bise Presidente Jejomar Binay ug ang konseho sa siyudad nga gipangulohan ni Bise Mayor Edgardo Labella ug ang 17 ka mga konsehal diin mayoriya kanila sakop sa Bando Osmeña Pundok Kauswagan ni kanhi Mayor Tomas Osmeña.

Matod sa mayor nga iyang hangpon kon mosanong sa imbetasyon ang mga konsehal sa BOPK apan kon dili sila motambong, dili na kini bag-o alang kaniya.

Gipahibawo usab ni Rama nga sa Hulyo 1, atol sa Inaugural Address sa konseho, motambong siya og mamulong atubangan sa mga konsehal subay sa imbitasyon ni Labella nga iyang kaalyado sa pulitika.

Ang mayor nikomed­ya nga atol sa iyang Soca, dili siya mag-solicit subay sa nanggawas nga suwat nga nangayo og libreng tubig ug pan base sa post sa Facebook ni Konsehal Sisinio Andales, kinsa higpit nga kritiko ni Rama.