NAALARMA na ang mga opisyal sa City Office for Substance Abuse Prevention (Cosap) sa gidaghanon sa mga empleyado sa Cebu City Hall nga positibo sa shabu karong buwana.

Si Dr. Alice Utlang, executive director sa Cosap, nitug-an nga 18 na ka mga kawani ang nasutang positibo sa shabu karong buwana.

Kini nagdala ngadto sa 33 sa kinatibuk-an sa mga kawani nga positibo sa drug test gikan sa buwan sa Enero.

Si Utlang nibutyag nga ang nakapakurat sa ilang bu­hatan mao ang duha ka re­gular employee ug tulo ka mga babaye nga positibo.

Wa kini mahitabo ka­niadto sa ilang pagpang drug test.

Ang executive sa Cosap niingon nga niining tunga-tunga sa 2015 sobra sa 100 porsiyento ang gisaka sa gidaghanon sa mga drug user sanglit niadtong 2014, aduna lang silay 15 ka mga kawani ang napositibo nga pulos nga gitaktak sa ilang tagsa-tagsa ka trabaho.

Samtang nalipay si Utlang sa resulta sa ilang gilusad nga drug test kagahapon sa 38 ka mga kawani sa City Agriculture Department apan way bisan usa ang nasutang tiggamitan.

Apan matod niya nga adunay usa ka empleyado ang wa nipatim-aw bisan giunsa pag-contact sa ilang mga kauban.

Ang Cosap mohimo og report bahin sa insidente lakip na ang wala nagpa drug test aron iduso ngadto sa buhatan ni Mayor Michael Rama aron sa pagpahamtang og tukmang silot.

Si Rama una rang nibutyag nga way luna sa City Hall ang mga kawani nga drug user ug sagad sa napositibo gitangtang sa trabaho samtang ang mga regular mosubay pa sa hustong proseso.