MAHIBAW-AN na ugmang adlawa kon kinsa o aduna bay mga pulis sa dakbayan sa Talisay ang marelibohan.
Kini human matapos na ang duha ka semana nga tagal ngadto sa Talisay Police sa pag-usab ug pagpakita sa ilang maayong performance.
Si Supt. Jason Villamater, hepe sa Talisay City Police Station, daan nang mipahibawo nga kon duna may marelib wala kini magpasabot nga dili sila maayo og performance.
Kagahapon sa buntag tak-om ang tanang kapulisan sa Talisay human sa ilang meeting uban sa ilang hepe.
Si Talisay City Mayor Eduardo Gullas mipatawag nakigtagbo usab sa hepe uban sa iyang consultant ug city administrator Atty. Rudylen Navarro.
Gimandoan ang kapulisan sa Talisay sa ilang labaw sa Cebu Provincial Police Office nga hingusgan ang ilang kampanya batok sa kriminalidad ug gihatagan silag duha ka semana sa pagtuman niini.
Kini tungod usab sa daghang reklamo batok sa mga pulis.
Si PRO-7 Director Chief Supt. Espino magpaabot pa sa lista sa pangan nga i-rekomendar ni Villamater.
Matod ni Villamater nga kon siya ang padesisyonon wala siyay irekomendar tungod kay natagbaw man siya sa performance sa iyang mga sakop.
Apan kon duna may kamandoan nga ipa-relibo alang sa usa ka re-training sa kapulisan andam siyang motuman niini tungod kay makatabang man usab kini sa iyang kapulisan.
Matod niya nga aduna karoy tulo ka mga pulis ang mawala tungod kay mo-schooling.
Nagkanayon si Villamater nga wala siya magpabaya sa pagpahimangno ug paghagit sa iyang kapulisan nga mohimo sa ilang trabaho.
Gani makita man karon sa ilang record nga nihimo sa ilang trabaho ang kapulisan sa Talisay.
Ang labing uwahing kalampusan nga nahimo sa Talisay police mao ang pagpatay ni Jessie Largo suspek sa pagpatay sa anak sa kanhi reporter human usab kini misukol sa dihang dakpon na unta kini.
Pipila usab ang nalambigit usab sa isyu nga pagpangilkil. (DRT)