DILI malikayan nga ikumpara nato ang atong airport sa ubang airport kung mobiyahe kita sa langyaw'ng nasud.

Matud pa sa mga eksperto sa turismo nga ang airport maoy "mata" sa nasud.

Kung laksot ang serbisyo, plastada ug desinyo sa airport hayan laksot sab ang maong nasud. Naglarawan kini kung unsa ka kusgon ug unsa ka hinay ang gobyerno sa pag-atiman sa iyang turismo ug sa katawhan mismo.

Tanan tingaling major airports sa nasud gipanag-iyahan sa gobyerno kay giisip kining public facility.

Kagahapon sa buntag, nibiyahe ako padulong sa Bangkok aron motambong sa usa ka semana nga workshop kabahin sa programa sa Plan International alang sa Asia.

Didto ni-landing ang eroplano gikan sa Davao sa NAIA Terminal 2. Gikan didto, nisakay ako og airport shuttle bus padulong sa Terminal 1 nga gitukod sa panahon ni kanhi Presidentes Marcos. Kinahanglan pang moguwa ang bus sa airport road aron motabok sa Terminal 1 nga duol ra kaayo. Maayo na lang kay buntag ug walay trapik sa maong lugar.

Nakapangutana ko nga kung rush hour ug naggukod sa schedule ang pasahero, posibleng makulgot sa trapik.

Unta naay agian nga lahi ang shuttlebus o kaha naay agianan nga nagdugtong mismo sa Terminal 1, 2, 3 ug 4 aron ang mga tawo na ang moadto gamit ang paspas nga escalator sama sa ubang nasud.

Gani naa pay ala-golf carts sulod sa airport nga sakyan sa pasahero, ilabi na sa mga hamtong ug masakiton. Dili na budlay sa ulan, init, trapik sama sa NAIA. Human sa pipila ka minuto naa na ako sa Terminal 1 nga maoy departure area sa sobra 15 ka international airlines.

Hastang daghana sa pasahero sa sulod nga naghulat sa ilang flights. Sakto gyud tingali tong datos nga kapin 500 ka mga OFWs ang mobiyahe gawas sa nasud aron motrabaho matag adlaw. Managkalahi ang ilang sinultian. May Bisaya, Ilonggo, Moro, Bicolano, Waray, Bol-anon, ug uban pa.

Hinuon, daghan sab nga mga langyaw ug kadtong dili hitsura nga trabahante nga apil sa tapok.

Tungod kay gamay ra ang lingkuranan, mapugos sa pagtindog ang mga pasahero o kaha moyaka sa kamig nga salog nga marmol. Mao gayud ni ang makita nato sa TV kung magpunsisok ang pasahero sa terminal ilabi na kung may okasyon sama sa pasko, kuwaresma ug New Year.

Ang mga bata nangatulog sa bukton sa ilang ginikanan nga di sab gustong molakaw kay basin mapulihan sa lingkuranan.

Nangutana na sab ko kung nganong dili madugangan ang mga silya ug lingkuranan nga unta barato ra man ang plastic chairs?

Di ba gyud makagasto ang gobyerno og ekstra nga unta duha ka plastic chairs man ang mapalit sa P500 nga terminal fee sa pasahero?

Ambot lang kung na-exempt ba na pod ang OFWs sa terminal fee nga atong mga "bag-ong bayani?"

Hastang daghana sa tawo nga nagpila sa counter ilabi na padulong sa Middle East.

Matod pa ni Alfred Tan, dugay nang trabahante sa Eva Air nga akong gikahinabi ug niingon nga mora sab daw ni diri'g EDSA nga hastang trapika.

Antus, Dong!