GIINGONG dakong kalampusan sa kasundalohan ubos sa Eastern Mindanao Command (Eastmincom) ang kamatayon sa banggiitang lider sa Pulang Bagani Command (PBC) 1 sa New People's Army nga si Leoncio Pitao, alyas Kumander Parago.

Si Parago dugay nang gipangita sa balaod gumikan sa daghang salaud nga nahimo may kalambigitan sa iyang pagkalider sa kalihukang NPA.

Si Parago hagbay nang gilutos sa mga sundalo sa Paquibato area kon diin giingong iyang balwarte ug sa mga rebelde.

Kasagaran dinhi mahitabo ang mga panag-engkuwentro sa tropa sa kasundalohan ug mga rebelde.

Daghang mga molupyo sa maong area nahasol ug wa magmalinawon ang ilang pagpuyo gumikan kay madamay sa kalihukan sa mga rebelde ug maipit usahay sa mga engkuwentro sa sundalo ug NPA.

Gani niadto lang milabay nga semana, dunay nahitabong engkuwentro sa militar ug NPA sa maong area kon diin tulo ka mga giingong lumad ang napatay.

Mga namatay padayon pang giimbestigahan human mikalampag ang usa ka militanteng grupo tungod kay di matud pa rebelde ang mga napatay.

Apan niining Sabado sa hapon, napatay si Pitao sa mga sakop sa Scout Rangers didto sa Purok 9, Barangay Panalum, Paquibato District.

Gilauman nga daghan matud pang mga rebelde ang moampo sa sabakan sa gobyerno human mapatay ang ilang gikonsiderang lider sa kalihukan.

Karon nga patay na si Pitao, magmamalinawon na kaha ang Paquibato District sa siyudad sa Davao?