DEPENSAAN ni Jhaleel Payao ang iyang World Boxing Council (WBC) Youth super flyweight title, batok ni Michael Dasmarinas karong Hulyo 11 sa Mandaluyong Gym sa Mandaluyong City.
Ang 21-anyos nga Payao kinsa gianggaan og “Cebuano Disaster” sa makausa pa moaway sa teritoryo sa iyang kontra nga naila usab sa iyang pagka-eksperiyensiyado.
Apan ang iyang trainer nga si Christopher “Ping-Ping” Tepora kombinsido nga ang iyang batan-ong pambato nga mouli sa Sugbo nga pabiling anaa gihapon ang bakus.
“Para nako di sab gyud angay kompiyansaan kay eksperiyensiyado man si Dasmarinas unya gawas pa sab ini naa ni sa ilang teritoryo,” matod ni Tepora.
Si Payao, sa iyang ensayo, perming ika-sparring si Vergilio Silvano ug ang wa pay pildi nga si Jack Tepora sa Omega Boxing Gym isip preparasyon ning awaya.
Nakuha ni Payao ang WBC Youth title human niya pildiha si Rene Dacquel pinaagi sa unanimous decision niadtong Disyembre sa Paranaque City.
Si Dasmarinas nakaaway na sa Japan ug South Africa. Iyang napildi si Hayato Kimura sa Japan pinaagi sa unanimous decision apan napildi siya sa split decision ni Lwandile Sityatha sa South Africa.
Si Payao adunay 11-0 ug unom ka knockouts nga record samtang si Dasmarinas nagkumkom og baraha nga 20-2, 13 knockouts.