COTABATO CITY -- Gihingusgan karon ni Autonomous Region in Muslim Mindanao (Armm) Governor Mujiv Hataman nga ang P27 bilyon nga Bangsamoro block grant alang sa Moro Islamic Liberation Front (MILF) gamiton sa mga programa alang sa Bangsamoro Government.

Migawas ang pagtin-aw ni Hataman human gi-akusahan ni Party-list Congressman Gary Alejano nga ang maong pundo gamiton lang sa pagpalit og armas sa MILF.

Apan gikanayon ni Hataman nga dako kining bakak ug pangpangdaut lang sa panghinabing pangkalinaw sa Mindanao tali sa gobyerno ug MILF.

Nasayran nga ang block grant makatabang sa bag-ong political entity alang sa maayo nga pagserbisyo sa katawhan.

Ang Armm usa sa mga pobreng lugar sa nasud ug hinay ang kalamboan tungod sa dekada nang mga kagubot.

Kon maaprobahan sa Kongreso ang Bangsamoro Basic Law (BBL) pinaagi sa usa ka plebisito, otomatiko nga mapapha na ang Armm ug mohulip ang bag-ong political entity sa rehiyon.

Kahinumdoman nga una nang giluwatan ni MILF 1st Vice Chairman for Political Affairs Gadzaali Jaafar nga ang isyu sa BBL gisakyan lamang sa mga politiko nga gusto nga magpahumot sa nagsingabot nga 2016 election.

Sa pagkakaron, nanghinaot si Hataman nga maaprobahan na ang BBL ug paboran sa mga magbabalaod sa Kongreso.