DIGOS CITY -- Gibalhin na sa Provincial Rehabilitation Center (PRC) si Matanao Mayor Butch Fernandez human nga nakagawas sa tambalanan.
Mibalik na sa normal ang kondisyon ni Mayor Fernandez, hinungdan nga hingpit na siyang nakagawas apan wa na gibalik sa prisohan sa Matanao Police Station, kon di tua na PRC sa Barangay Matti ning dakbayan.
Gitataw ni Senior Inspector Elmer Cabuslay, hepe sa Matanao police sa pakighinabi kagahapon, nga wa na sa ilang hurisdiksyon si Fernandez human nagpaguwa na og commitment order ang Regional Trial Court Branch 21.
Kahibaloang gimando ni RTC Branch 21 Presiding Judge Loida Posadas Kahulugan ang pagbalhin sa mayor ngadto sa PRC atol sa clarificatory hearing niadtong Hunyo 17.
Apan mitaas ang blood pressure sa mayor human niguwa ang mando mao nga gidala kini sa Digos Doctors Hospital.
Si Fernandez ug kanhi Davao del Sur Governor Douglas Cagas nag-atubang og kasong murder human gitudlong mastermind sa pagpatay sa mamahayag nga si Nestor Bedolido niadtong Hulyo 2010.
Pulos milimod ang mga suspetsado mao nga boluntaryo silang mitahan ngadto sa otoridad.
Sa unang semana sa Agosto, gitakda sab nga dunggon sa korte ang gipangayong motion to bail sa mga akusado aron pag-angkon og temporaryong kagawasan. (OBD)