GIDALI pagtabang sa paramedics team sa Central 911 si kanhi Regional Intelligence Unit-Davao head Police Superintendent Leonardo Felonia human nagguot ang iyang gininhawa sud sa selda sa Davao City Police Office (DCPO) alas 2:00 sa hapon niadtong Dominggo.

Gisaysay sa spot report gikan sa Investigation Detective and Management Branch (IDMB) nga mitawag sila og ambulansya sa Central 911 kay naglisud pagginhawa si Felonia.

Giingon ni DCPO spokesperson Police Senior Inspector Milgrace Cajes Driz nga mireklamo si Felonia gumikan sa nasimhot nga pintura nga gigamit pagpamintura sa selda sa IDMB.

"Since nga bag-o ang hepe sa IDMB, gipinturahan ang sulod sa selda, mao siguro to ang nasimhot nga baho ni Felonia," sulti ni Driz.

"But so far, gibutangan naman og uling aron mawala ang baho, naa say air freshener," ingon ni Driz sa pakighinabi sa Superbalita.

Daling miabot ang medic 244 nga gipangunahan ni Jobesyl Gelacio ug gidala si Felonia sa SPMC.

Si Felonia maoy giakusahang mastermind sa pagpusil-patay sa Cebuano nga negusyanteng si Richard Lim King niadtong Hunyo 12, 2014. (JPC)