KINSA ang magdahum nga ang usa ka 'testing' nga show sa ABS-CBN nga "It's Showtime," mamahimong usa ka dakong hit sa uwahing bahin sa tuig 2009?

Ang maong show nga gipangunahan nila ni Anne Curtis, Vhong Navarro, Kim Atienza ug duha ka bokalista sa banda, nahimong addictive sa mga manan-aw sa udto.

Gani, nahimong numero uno sa rating sa daytime show ang "It's Showtime" diin napildi na niini ang Wowowee sa kapin buwan pa lamang niini sa ere.

Bisan sa Mega Manila ratings, ni-gahot gayud ang "Showtime."

Gawas sa mga hosts, nahimong pangdani sab ang ilang resident judge nga si Vice Ganda nga nagpa-uso sa linya'ng "... dahil diyan, may nag-text!"

Kung tan-awon, matawag nga usa ka experimental nga show ang "Showtime" sa ABS-CBN nga daw gikuha sa format sa mga shows sama sa America's Got Talent ug uban pa. Apan nakuha niini ang kasing-kasing sa masa, sa mga pa-sosyal ug mga sosyal.

Tungod niini, giingon nga todo na karon ang kabalaka sa mga kaatbang nga shows sa "It's Showtime" sama sa SiS sa GMA.

Dako sab ang pasalamat sa "It's Showtime" hosts sa mga misuporta sa maong show ilabina kay nigawas gayud nga gimahal sa tanan ang mga pasundayag ug mga paglingaw nga nahimo sa maong show.