WA gyud nadala sa paglabay sa tuig 2009 ang kasuko sa usa ka mag-uuma hinungdan nga bisan og unang adlaw sa tuig 2010 gidunggab niini ang iyang gikabikil.
Ang biktima giila nga si Eduardo Masamloc Moda, hamtong, minyo ug taga Barangay Lagumit didto sa lungsod sa Malita, Davao del Sur.
Sa imbestigasyon ni SPO3 Ramon Iballo, gibutyag niini nga si Maliapen Katimongan Salip, 45, ug taga didto ra sab sa lugar, maoy nanunggab sa biktima.
Subay ni Iballo, mga alas 7 ang takna sa buntag niadtong adlawa kalit lang nga gi-adtoan sa suspek ang pinuy-anan ni Moda, dihang nakit-an niya kini nahitabo ang komprontasyon.
Apan, wa magdahom ang mga kabanay sa biktima nga mahimong maduguon ang pagsud sa tuig 2010 didto sa ilang lugar human nga gihansakan sa suspek og kutsilyo ang tiyan sa biktima.
Maayo na lang kay may nakatabang sa biktima ug gihatod kini didto sa Davao del Sur Provincial Hospital.
Human nakamatngon ang suspek nga nakahimo siya og salaod, boluntaryo niining gitahan ang iyang kaugalingon ngadto sa buhatan sa kapulisan.
Gitataw ni Iballo nga personal nga bikil sa duha maoy rason nga nahitabo ang krimen. Gihan-ay na sab sa kapulisan ang kaso nga ipasaka kontra sa suspetsado. (Dondon Dinoy)