CENTRAL MINDANAO -- Patay ang usa ka negusiyante human gipusil sa mga armadong grupo didto sa probinsiya sa Sultan Kudarat.

Biktima giila sa kapulisan nga si Eskak Tadriz, 43, minyo, buy and sell trader ug molupyo sa Barangay Poblacion, Palimbang.

Sa taho gikan Sultan Kudarat Police Provincial Office nasuta nga banda alas 8:20 sa gabii, Disyembre 31, samtang nagtindog ang biktima duol sa iyang tindahan nga naglantaw sa mga kabataan nga nagpabuto og mga firecrackers kalit kining giduol sa duha ka wala mailhing suspek ug gipusil gamit ang kalibre .45 nga pistola.

Patay on the spot si Tadriz dihang naigo sa iyang ulo ug dughan nga parte sa lawas.

Mga mamumuno dali sab nga mi-eskapo sakay sa usa ka motorsiklo paingon sa wala matino nga direksyon human sa pagpamusil.

Matud ni Saimalib nga dugay pa niya namatikdan nga patay na diay ang iyang bana.

Nagtuo lang siya nga natulog lang kini sa lingkuran.

Apan dihang mibanaw na ang daghang dugo didto na niya nakumpirma nga gipusil diay ang iyang bana sa wala mailhing mga suspek.

Wala sab dayon niya mahibal-i nga kini giluthang na diay gumikan niadtong mga orasa grabe ang buto-buto sa mga firecrackers.

Mga pulis padayon sa pag-imbestiga sa kaso ning panahona. (Edgardo Fuerzas)