SAMAD pinusilan ang nadawat nga sinugatan sa usa ka ulitawo gikan sa ahente sa MAPIO sa alas 2:30 sa kaadlawon niadtong Enero 1, 2010.
Ang biktima mao si Ian Suyco, 21, ulitawo, nagpuyo sa # 68 Purok 8, Barangay 2-A Poblacion samtang ang suspetsado giila nga mao si Renato Aurello Item, 29, minyo, nagpuyo sa Madapo Hills, Barangay 5-A Poblacion, siyudad sa Davao.
Si Suyco nakaangkon og samad pinusilan sa iyang walang bukton human siya gipusil ni Item samtang nagtindog duol sa Community Hospital and Development Cooperative (CHDC) sa dalang Magallanes.
Ang biktima daling gidala sa iyang mga higala didto sa CHDC samtang ang suspetsado daling mibiya sa nahitaboan sa krimen uban ang iyang hinigugma lulan sa motorsiklo.
Nakuha gikan sa crime scene ang duha ka basiyo sa bala sa .45 kalibre nga pistola.
Sa gihimong follow-up operation sa kapulisan nga gipangulohan ni SPO1 Ricky Obenza, nasikop si Item sa alas 4:30 sa kaadlawon didto sa City Hall Drive.
Nakuha gikan sa suspetsado ang usa ka .45 kalibre nga pistola nga dunay lima ka buhing bala ug serial number 1106060.
Gitanggong karon ang suspetsado sa selda sa San Pedro Police Station samtang giandama ang kasong frustrated murder batok kaniya. (AD)