KAMATAYON ang sinugatan sa usa ka guest relation officer gikan sa iyang hinigugma human siya giluba sa makadaghan nga higayon sulod sa Neneng Dapur Resto Bar didto sa Saavedra Extension, Toril Poblacion niadtong Enero 1, 2010.

Nakaangkon og daghang samad sa kalawasan hangtud namatay mao si Shiela Pagara, hamtong ang pangidaron, nagpuyo sa Talomo Cemento, Brangay Talomo Proper, siyudad sa Davao.

Base sa imbestigasyon sa kapulisan sa Toril Police Station, nahitabo ang pagpatay sa alas 3:45 sa kaadlawon human nagkalalis ang biktima ug ang iyang hinigugma nga si Noel Cagadas Abella, hamtong ang pangidaron, nagpuyo sa Curvada, Barangay Lizada, Toril District.

Nasayran nga sa wala pa mahitabo ang insidente, sigun sa imbestigasyon, nagkasabot ang biktima ug suspetsado pinaagi sa text message nga magkita sila sa Neneng Dapur Resto Bar.

Samtang nagkita ang biktima ug suspetsado sulod sa maong bar, nagkalalis ang duha sa wala masayri nga hinungdan nga miresulta sa duguong hitabo.

Si Pagara nakaangkon og daghang samad sa iyang kalawasan

dihang giduslak sa iyang hinigugma og hait nga kutsilyo hangtud nga namatay.

Human sa hitabo, ang suspetsado daling misibat gikan sa crime scene paingon ngadto sa wala na masayri nga lugar.

Nakuha sa kapulisan gikan sa posisyon sa biktima ang duha ka cellular phone, usa ka Seiko ladies wrist watch, bracelet ug salapi nga nagkantidad og P407.

Ang patay'ng lawas sa biktima atua karon gihaya sa Angel Funeral Homes samtang ang suspetsado gipangita sa mga otoridad.

Sa laing bahin, usa ka lalaki ang namatay human nabangga ang ilang gisakyan nga motorsiklo sa alas 5:00 sa hapon niadtong Biyernes didto sa Greenhills, Barangay Catalunan Peque¤o, siyudad sa Davao.

Namatay mao si Ruel Macasampa, hamtong ang pangidaron, nagpuyo sa Kilometro 12, Barangay Catalunan Pequeño.

Si Macasampa nagmaneho sa iyang Honda Scooter kauban si Ronie Reponte gikan sa Ulas paingon sa Mintal Proper apan pag-abot nila sa Greenhills nabangga sila sa tuong pultahan sa Isuzu Opel Sedan (plate number LAV-794) gimaneho ni Nestor Nicolas, 63, nagpuyo sa Kilometro 10, Barangay Catalunan Pequeño.

Ang sakyanan ni Nicolas miliko patuo aron mosulod sa Greenhills Subdivision apan nabangga ang scooter ni Macasampa mao nga natumba sila ug nakaangkon og mga

samad sa kalawasan.

Sila Macasampa ug Reponte daling gidala didto sa Adventist Hospital sa Bangkal apan gideklara nga patay na si Macasampa dihang miabot sa tambalanan.

Si Nicolas atua gikustodiya sa Talomo Police Station samtang giandam ang kasong reckless imprudence resulting to homicide, physical injuries and damage to properties. (AD)