ANG taas nga opisyal sa 10th Infantry Division (ID) misulti nga ang P5.6 million nga ganti sa tawo nga misumbong asa nahimutang ang napatay nga si Leoncio Pitao, alyas Kumander Parago, sa Pulang Bagani Command 1 sa New People's Army (NPA), ihatag sa militar ngadto sa ilang sibilyan nga impormante.
Si Major General Eduardo Año, commander sa 10th ID, misulti nga ang impormasyon nga gitunol sa sibilyan nga impormante maoy nakatabang kanila sa pagneyutralisa sa gikaintapang lider sa NPA niadtong Dominggo sa hapon.
"Yung civilian na yun malaki ang contribution niya sa success sa operation. Pero hindi na namin idi-divulge ang identity of the informant for security reasons. Makakatanggap siya ng P5.6 million na bounty ni Commander Parago," sulti ni Año ngadto sa mga tigbalita atol sa press conference didto sa Grand Regal Hotel.
Si Parago nakaangkon og daghang warrant of arrest tungod sa krimen nga iyang nahimo lakip na ang pag-masaker sa Religious Group Peccavi niadtong Oktuber 21, 1987; masaker sa pamilyang Zabala niadtong Nobyerno 23, 1989; pagpatay kang Josefino Estaniel niadtong Mayo 2008; pagmasaker sa tulo ka managsuong Tulang niadtong 2009; pagdagit ug pagpatay kang Intoy Baquioin niadtong Oktubre 2009; ug daghan pa.
Si Año mikumpirma nga ang tawo nga napatay sa engkwentro sa Paquibato District mao si Commander Parago.
"We are 101 percent sure that he is Parago. Former rebels have also identified him based on the marks and dentures on his face," sulti ni Año.
Si Año nagsulti nga ang operasyon nahimong successful tungod sa hiniusang paningkamot sa 10th ID's Task Force Minions nga gi-organisa niadtong Disyembre sa miaging tuig aron kuhaon si Parago patay o buhi.
Human sa 20 minutos nga pinusilay sa NPA ug sundalo, naugkat nila ang patay nga lawas ni Parago ug iyang medical aide, Kyle Hermoso Limpag.
Ang kamatayon ni Parago, suma ni Año, makapahinay sa mga rebelde sa Davao Region.