SA ikatulong higayon sulod sa unom ka mga tuig, usa na sab ka unrestricted free agent si LeBron James.

Hinuon ang nakalahi ning higayuna, wala’y plano nga mobalhin og laing team ang kanhi four-time MVP.

Dili gamiton ni James ang iyang opsyon nga $21.6 million alang sa sunod season, matod pa sa usa ka kasaligang tinubdan sa The Associated Press nga wala nagpaila gumikan kay wala pa kini gibutyag ni James ug sa Cavaliers sa publiko.

Ning maong lakang, si James mahimong mo­pirma og bag-ong kon­trata – posible duha ka mga tuig – diin magdawat siya og mas dako nga suweldo kumpara sa miagi niyang kontrata.

Gilauman nga mobalor og kapin sa $22 million matag tuig ang bag-ong kontrata ni James.

Sa labing unang higayon nga nahimong unrestricted free agent si James, mibiya siya sa Cavaliers ug mibalhin sa Miami Heat diin nakabira siya og duha ka mga titulo sulod sa upat ka sunodsunod nga pag-abante sa finals.

Ning higayuna, plano ni James nga magpabilin sa Cavaliers samtang sila si team owner Dan Gilbert ug general manager David Griffin naghimo og lakang aron mapalig-on pa ang ilang puwersa.

Si James nagkinahanglan og igong suporta alang sa tinguha niini nga matambalan ang 51 ka mga tuig nga kahidlaw sa Cavaliers og mayorihiyang titulo sa bisan unsang klase sa paugnat sa kusog.

Daghan pang dagko nga desisyon nga kinahanglan buhian sa Cavaliers kabahin sa lain nilang mga sakop nga free agents nga sila si Kevin Love, Tristan Thompson ug Iman Shumpert.

Sa sitwasyon ni James, nakaseguro na ang Cavaliers nga dili gyud kini mobiya o magpatintal sa bisan unsang tanyag.

“We’ve heard from him every day pretty much relative to our roster,” batbat ni Griffin. “It’s been great. He’s been very much engaged with us on a lot of different levels, so it’s been positive.”

Sa iyang pagbalik sa Cleveland, naagak ni James ang Cavaliers sa ikaduha pa lang niining pagsulod sa finals apan napilde sila sa Golden State Warriors, 4-2, sa series. (AP)