MAAYONG balita alang sa Sugbo ug sa tibuok rehiyon ang atong nakutlo gikan sa Bureau of Customs. Mao kini ang maayong dagan sa atong ekonomiya karong 2016 ug atong malantaw nga mopadayon kini karong 2017.
Usa sa mga indikasyon nga tulin ang pagtubo sa ekonomiya mao ang collection performance sa bureau.
Bisan pa og nagkagamay ang porsyento sa buhis sa mga imports kun mga produkto nga nisulod agi sa pantalan ug airports sa Sugbo ug Dumaguete, nagpasabot nga kon modako ang Customs collection, mas dako pa ang kadak-on sa mga importasyon.
Sa atong pagtuki sa klase sa mga importasyon, dako ang mga raw materials alang sa mga power plants, sa Apo Cement, ug mga food imports. Ug motubo lang pag maayo ang importasyon kon maayo ang dagan sa atong ekonomiya.
Buot ipasabot, sobra pa sa kalamposan sa Customs, kining maong performance nagsamin sab sa kahimsog sa ekonomiya sa Sugbo karong 2016.
Alang sa mga sakop sa Bureau of Customs sa Sugbo, subra pas maayong performance kining makalabaw sa ilang collection target og kapin sa bilyon ka pesos ang ilang nakolekta alang sa kaban sa kagamhanan ni Presidente Rody Duterte.
Nagkanayon si Customs District Collector Koko Holganza nga tungod kini sa pagtinabangay ug kahago sa mga kaubanan sa Bureau of Customs dinhi sa Sugbo, Mactan, ug Dumaguete.
2017
Basi sa mga taho nga atong nakutlo sa tibuok nasud, gilantaw karon nga magpadayon ang pagtubo sa ekonomiya sa Pilipinas nga 7.1 percent.
Gani, nagkanayon si Trade Secretary Ramon M. Lopez nga kining maong economic performance magpadayon karong 2017.
Nagpasabot kini nga kusog ang katakos sa katawhan nga mogasto kay nagkadaghan karon ang duna nay trabaho.
Atong gipaabot nga makabwelo sab ang lain-laing mga anti-poverty programs sa administrasyon ni Presidente Rody Duterte nga gipang-andam karong last quarter sa 2016.
Kilusan
Lakip sa mga preparasyon sa miaging mga bulan mao ang pagtinabangay sa Kilusang Pagbabago ug ang National Anti-Poverty Commission.
Dayon, karon lang Disyembre, gitukod ni Presidente Duterte ang Office for Participatory Governance (OPG) nga maoy mo-facilitate sa kooperasyon sa mga tali sa katawhan sa usa ka bahin ug ang lain-laing ahensya sa kagamhanan ug mga local government units (LGU) sa pikas bahin.
Hilongos
Seryuso nga nangaangol ang unom sa 32 ka mga nabiktima sa pagpamomba didto sa Hilongos sa miaging semana.
Atong nasayran nga sa unom, usa niini mabdos. Duha sab ang sakop sa Kilusang Pagbabago diha mismo sa lungsod sa Hilongos ang nalakip sa mga seryuso.
Matod pa, usa sa sakop sa KP nagtuo nga naigo lang siya sa hawak ug paa. Apan dihang gipa-check up, daghan diay ang mga shrapnel nga niigo sa iyang tibuok lawas.
Sa pagkakaron, atong nasayran nga nanawagan sa ilang tibuok mga sakop sa tibuok Visayas nga mopadala og mga hinabang alang niining mga nabiktima sa pagpamomba.
Sa wala pa ang Pasko, nanghatag og mga tulda ang mga sakop sa Kilusang Pagbabago uban sa mga opisyal niini gikan sa kaulohan ug sa incoming Usec Joselito ‘Penpen’ Libres sa mga nasunogan sa Duljo, Syudad sa Sugbo.
Nakahibawo na man kita nga kining Duljo mao baya ang balwarte sa napatay nga druglord nga si Jaguar ug maingon nato nga training ground sa druglord sa Leyte nga si Kerwin Espinosa.
Karon, ang ilang panawagan samtang nag-consolidate sa ilang han-ay mao kining pagtabang sa mga biktima sa pagpamomba sa Hilongos.
(@anol_cebu sa Twitter)