DAGHAN man tuod ang mga pabuto nga nisugat sa miaging Bag-ong Tuig, lahi ra gyud kini sa miaging katuigan. Mas daghan sab karon ang nibalik sa paggamit og mga lantaka. Hinuon, lahi na ang mga lantaka nga niuso pagbalik karon kay maka-ingon kini nga hand-held na ug mas daghan ang variety sa pagkahimo.

Kinaraan na gyud ang kawayan. Nibalik kining ginamit ang sinumpay nga mga lata sa mga soft drink nga unang niguwa kaniadtong tin-edyer pa ko. Mas tipid man gud kining maggamit lang og lighter fluid o butane kay sa mopalit og mas mahal na nga kwitis, whistle bomb, ug mga triangle.

For updates from around the country, follow Sun.Star on Twitter

Bisan pa man, nidaghan karon ang namalit niining mas mahalon nga mga fireworks nga nakapahimong mabulukon sa kalangitan bisan pa man og nag-ulan.

Unsaon, kinaiya na man gyud nato nga mosugat sa Bag-ong Tuig ginamit ang pabuto. Samtang nimingaw ang politika kay gituohang nihulat ang mga politiko sa campaign period usa mobubo sa ilang pundo, gipaabot karon nga alegre ang Pilipinas sa 2010.

Aw nganong di maalegre nga, matod pa, sama og carnival man kining politika. Hinuon, maunsa man ang moabot karong 2010, manghinaot ko nga mahimong mas malipayon kini karon kay sa miaging katuigan.

PUNDO

Wa man ko kakita sa breakdown sa P600 milyones nga political budget ni Mayor Tomas Osmeña apan dako-dako gyud niini mao ang planong ihatag sa mga senior citizen. Nisaad na man siya nga mohatag og labing dako P4,000 matag usa sa wa pa ang piliay.

Alang sa mga senior citizen nga karaang mga Osmeñista, sama ra kini og ganti alang sa ilang padayong pagsuporta. Sama ra sab og gipalit ang ilang boto. Alang sa mga tradisyonal nga politiko, brayt kaayo kini nga stratehiya sa paggamit sa pundo sa Syudad aron masiguro nga di sila mapalit sa kaatbang.

Di lisod tugkaron nganong importante ang mga senior citizen. Mao kini ang mga karaang tigsuporta ni Serging Osmeña sa wa pa ang balaod militar.

Daghan na sab kini og mga apo ug apo sa tuhod nga posibleng makaboto na karong 2010.

Buot ipasabot, ang people’s money nga P4,000 matag usa dako kaayo og mahimo karong Mayo 2010. Maglisod og atbang niini ang oposisyon ginamit ang own money.

Makaingon kini nga di angay ang maong tapad sa pundo. People’s money batok own money.

BATOKAN?

Kay wa may sakop sa Konseho nga iya sa oposisyon, siguradong walay moreklamo niining paggahin sa pundo sa Syudad sa Sugbo alang sa pamulitika.

Gani, kompyansa na kaayo si Mayor Osmeña nga nitawag niini nga political budget. Gituohan karon nga di kini mababagan pinaagi sa Konseho.

Ambot lang hinuon kon gitun-an na ba sab sa oposisyon ang posibilidad nga modangop sa korte, Ombudsman, o sa Commission on Elections (Comelec) aron mababagan kining maong paggahin sa people’s money alang sa politika.

Kon mao man gani kini ang ilang duwaon, dunay posibilidad.

Apan nasiguro sab ko nga panalipdan sa BO-PK ang maong stratehiya kay mahinungdanon kini aron makapakita og daghang mga proyekto karong hapit na ang piliay.

Nakahibawo na man kita nga sulod sa pipila ka tuig, way klarong agi ang Syudad sa Sugbo kon social services ug mga proyekto sa barangay ang atong hisgutan.

Gani, gusto pa man ni Mayor Osmeña nga ibaligya ang Cebu City Medical Center (CCMC), ang hospital nga gitukod sa iyang amahan alang sa mga kabus, kay buot sa mayor nga makaipon og pundo alang sa pagbayad sa dakong utang sa South Reclamation Project (SRP).

SAKRIPISYO

Klaro sa mga Sugboanon nga gisakripisyo ni Mayor Tomas Osmeña ang pundo nga alang unta sa mga proyekto nga makaayo sa mga kabus.

Plano niya nga bawion kini karong hapit na ang piliay kay nagtuo siya nga makalimot na kita sa iyang kakulangan kon karon siya mobubo og mga proyekto.

Aron makaipon siya og dakong pundo aron igo nga makabayad sa binilyon nga utang sa Syudad samtang makabubo og kwarta karong hapit na ang piliay, iyang gisiguro nga mosaka pag-ayo ang mga buhis ug gipahigayon sab kining negusyo sa towing.

Wa unta makauyon si Bise Mayor Mike Rama niining towing kay ang mga mabiktima kuyaw nga di makalimot inig abot sa piliay. Apan human gihadlok si Rama nga mawagtangan sa suporta sa BO-PK, niatras kini ug karon sama sa tawo nga niduko ug nag-awt.