KADAGHANAN kanato aduna pa siguroy hang-over sa pagsa-ulog sa pagsugat sa Bag-ong Tuig. Apan wala pa gani mohagtok ang takna-an sa alas dose sa tungang gabii niadtong Disyembre 31 nga maoy atong pagsugat sa bag-ong tuig, aduna nay mga nabiktima sa pabuto didto sa kauluhan og dinhi sa ato. Aduna gayod gani mga kinabuhi ang nakalas. Ang uban direktang biktima sa pabuto samtang ang uban may kalambigitan sa pagpabuto nga wala sa lugar.

Didto sa kauluhan, adunay usa ka tawo nga nag-check-in sa usa ka hotel. Namahaw siya sa restaurant sa maong hotel sa buntag sa Disyembre 31. Iyang gibadlong ang mga batan-on nga nagpabuto doul sa hotel lobby kay naka-estorbo sa mga guests. Mituo ang mga nagpabuto ug nanglakaw.

For updates from around the country, follow Sun.Star on Twitter

Apan sa dihang migawas ang maong tawo sa hotel, giatangan diay kini siya sa mga batan-on nga una niyang gibadlong nga nagpabuto. Kalit siyang gidunggab ug namatay. Pastilan no, gumikan lang sa pabuto nga wala sa lugar, usa ka kinabuhi ang nakalas. Pagkawalay hinungdan.

KUYAMOY

Kasagaran sa mga biktima sa pabuto, ang mga kuyamoy gayod ang ma-damage. Morag gihilap ang akong kasing-kasing nga nagtan-aw sa telebisyon news sa mga biktima sa pabuto nga gidala sa mga tambalanan didto sa kauluhan. Unya ra ba kasagaran gayod mga bata. Diha gani toy file photo sa Philippine Daily Inquirer nga napatik sa front page niadtong Disyembre 31, nga nagpakita sa 7 anyos nga bata nga nagusbat ang usa ka kamot kay nabuthan sa pabuto. Sus, morag karneng baboy nga gihiwa.

Ang uban wala pa gayod motagam ug wala gayod magmatngon. Pastilan lisura ra bang ning maputlan ta og kuyamoy. Gawas nga ma-uwaw ta, lisod pa gyod mohawid og mga butang nga kuwang ta sa tudlo. Mas labi pa gyod nga lisud kon magtext ta nga kuyamoy sa tiil ang gamiton. Hay, kanus-a pa man tawon maleksiyon ang uban.

Oh, may mga kamay at daliri pa ba kayo dyan? Kung meron pa, eh di palakpak naman kayo.

MENSAHI

Nindot ang New Year’s message ni Arsobispo sa Sugbo Ricardo Cardinal Vidal. Nanawagan siya og panaghi-usa sa atong mga political leader ug tanan nga nagkabangi. Gani andam ug tagana ang Halandong Kardinal nga mohimo og ehemplo pinaagi sa panag-uliay og maayong kabubut-on ni Venancio Cabillon a.k.a Frater Paul Mary, ang

gipalagpot nga monghe sa Marian Shrine sa Lindogon, Simala.

Si Kardinal Vidal giapil og kiha ni Cabillon human matod pa paka-uwawi ang kanhi monghe sa newsletter sa Archdiocese, Ang Bag-ong Lungsuranon. Andam ug tagana nga mangayo og pasaylo ang Kardinal kang Cabillon. Tiaw nimo na, ang Kardinal nagpa-ubos. Kamo pa kaha?