BISAN pa sa gihimong subsob nga kampanya sa Department of Health (DoH) nga maglikay sa pabuto, dinhi sa Central Visayas gituohang mas nidaghan hinuon ang nangabuthan karong tuiga.
Moabot sa 57 ang natalang mga biktima sa Regional Epidemiology and Surveillance Unit (Resu) gikan Disyembre 21 sa niaging tuig hangtod kagahapon nga mas ubos lang og usa ka kaso sa 58 ka mga biktima sa niaging tuig.
Matod ni Jesson Morata sa Resu nga ang monitoring sa Iwas-Paputok motapos pa karong Enero 5 maong ilang gipaabot nga duna pay madugang sa ilang talaan ilabina na kay ang ubang mga ospital late makaduso og report.
Hinuon kadaghanan sa mga nabiktima nakaangkon lang og mga minor injuries ug sagad mga hamtong na ang pangedaron ug nagkadaiya ang matang sa pabuto nga nakaangol kanila.
Sa 57 nga kinatibuk-ang total sa mga biktima, upat niini ang nangamatay ug 5 ang biktima sa stray bullet sukwahi sa niaging tuig nga way namatay ug usa lang ang naigo sa saag nga bala.
Ang nangamatay mao kadtong tulo nga nasunog sa pag-ulbo sa baligyaanan og pabuto sa Mandaue City ug ang bata nga nabuthan og lantaka sa Talisa City.
Mayoriya sa mga kaso naggikan sa lalawigan sa Sugbo particular na sa Cebu City samtang duna say natala nga tag-upat ka mga kaso sa Bohol ug Negros Oriental ug negatibo sa Siquijor.