ANGAY nga hingpit nga hatagan og kagawasan ang katawhan sa dakbayan sa Talisay aron mahimo kini nga magmalambuon sama sa ubang siyudad.

Kini maoy awhag ni kanhi Bise Mayor Aberdovey Belleza ngadto sa mga opisyal sa Talisay nga gihulagway niyang di hingpit nga gawasnon sa pagpadagan sa gobiyerno tungod kay nag-agad sa usa ka lider.

For updates from around the country, follow Sun.Star on Twitter

Wa itumbok ni Belleza kon kinsa ang giagad sa mga opisyal apan masabot nga si Kongresista Eduardo Gullas tungod kay mao man kini ang lider sa pulitika sa distrito.

Ang panglantaw ni Belleza gidasonan sab sa pipila ka mga barangay kapitan nga nikompirmar nga di gawasnon ang mga opisyal sa Talisay tungod kay mag-agad man kanunay ni Gullas.

“Tanan nga mga kalihukan sa siyudad kinahanglan gyud nga ipahibawo ni Congressman Gullas. Unsa naman lang diay ang kabuot sa atong mga opisyal? Gipili sila para sa katawhan ug di kay sa usa lang ka tawo ug mobarog gyud unta sila,”asoy sa usa ka kapitan nga nihangyong di magpaila.

Ang Talisay una nga nasiyudad sa Naga apan namatikdan nga way mga investor nga nibubo sa ilang puhonan dinhi.

Matod ni Belleza nga daghan sa mga negusyante ang nireklamo kaniya nga magpanagana og bubo og puhonan sa Talisay tungod kay daghan man ang mangilkil kanila.

“Nahadlok sila nga mo-invest sa Talisay kay daghan daw ang manigbas?,”matod ni Belleza.

Ang Sun.Star Superbalita nakakuha og impormasyon nga dunay dakong negusyante nga mobukas unta og bodega sa Talisay apan niatras tungod kay dunay opisyal sa siyudad nga nidemanda og dakong kantidad.

Apan si City Administrator Richel Bacaltos nisukwahi sa pamahayag ni Belleza.

Matod ni Bacaltos nga daghan nang mga negusyante nga nisud sa Talisay ug makatuoran niini daghan ang niduol sa local government unit aron sa pagkuha sa mga permit.

Apan gipasabot sab niya nga dunay mga ordinansa nga gituman ang siyudad nga di mahimong bisan asa na lang ibutang ang mga negusyo hinungdan nga sila maoy mo-facilitate kon asa ang maayo nga kabutangan niini.

Si Belleza nipasabot nga ang siyudad napakyas sa paghimo og local investment code nga gikinahanglan kaayo sa usa ka siyudad.