HUROT og kadangat sa tambalanan ang 15 ka mga pasahero ug kritikal ang kondisyon sa konduktor sa PUJ nga nibangga sa kotse sa Pepsi Cola nga nilabang sa highway sa Cebu South Coastal Road (CSCR) sa barangay San Isidro,Talisay city kagahapon sa buntag.

Pasado alas 7 sa buntag, paingon ang PUJ nga dunay rutang Talisay-City Link and vice-versa sa kadagatan sa Talisay tungod kay mangaligo og dagat ang mga sakay.

For updates from around the country, follow Sun.Star on Twitter

Puno ang sakay sa PUJ (GWI-721) nga gimaneho ni Eduardo Bantilan, 25,minyo, taga Artville, San Isidro,Talisay city.

Si Bantilan nitug-an nga nilabang siya sa karsada dihang go na ang signal apan ang kotse (XHG-896) sa Pepsi nga gimaneho ni June Javelosa, 28, padayon sab nga nilabang hinungdan nga iyang nabanggaan.

Nagkuros ang dan sa CSCR nga nahitaboan sa aksidente.

Tungod sa kakusog sa impact sa bangga, natumba ang PUJ ug nalabay ang konduktor nga nailhan nga si Rommel Campugan, 22, taga San Isidro.

Si Campugan naa sa Vicente Sotto Memorial Medical Center (VSMMC) giobserbahan pa tungod kay siya ang nagrabehan.

Base sa impormasyon nga nakuha sa mga imbistigador sa traffic division sa Talisay, critical ang kahimtang ni Campugan nga gidala sa Talisay District Hospital (TDH) mao nga gibalhin sa VSMMC.

Matod ni Bantilan nga ang ubang mga pasahero nakaangkon og mga samad ug bun-og sa kalawasan ug dunay nabalian.

Samtang sila si Javelosa ug Wilfredo Go, sakay, giingong nakaangkon sab og mga pangos, apan nagrabihan ang nauwahi.

Si Javelosa, hingkod, taga N. Bacalso avenue samtang si Go naipit tungod sa kakusog sa panagbangga. Si Go, 44, minyo, supervisor sa Pepsi ug taga Maglasang subdivision, Cansojong, Talisay city. (VLM/dugang taho ni Junette Yamyamin, STC Intern)