TULO ka gidudahan nga mga tulisan nasikop sa kapolisan human giingong ningtulis sa usa ka trabahante sayo kagahapon sa kadlawon sa eskina P. Del Rosario ug Osmeña blvd., siyudad sa Sugbo.

Nakuha pagbalik sa kapulisan ang cell phone nga nakuha gikan sa biktima.

For updates from around the country, follow Sun.Star on Twitter

Ang mga suspek giilang mao sila si Zaldy Calomarde, 21, taga brgy. Carreta; Samuel Marata, 24, taga Duljo; ug si Nino Medina, 25, taga Kinasang-an.

Ang biktima giilang mao si Floro Lofranco, 26, taga Dumlog, Talisay city.

Sa pasiuna nga imbestigasyon sa kapulisan, naglakaw ang biktima pasado alas 4 sa kaadlawon sa dihang gisugat sa mga suspek ug gipangayoan og kwarta, apan way gikahatag ang biktima.

Ang usa sa mga suspek ningduol ug dayon gikapkapan si Lofranco hinungdan nga nakuha ang iyang cell phone gikan sa iyang bulsa.

Nihana og reklamo ang biktima, apan ang usa sa mga suspek niingon nga “pusila na”, samtang ang laing kauban nihana pagbunot diha sa iyang kilid.

Tungod sa nahadlok sa biktima, wa na lang siya molihok pa ug gipasagdan ang mga suspek nga daling nakasibat.

Nalabyan sa nagpatrolyang mga sakop sa Mobile Patrol ang biktima hinungdan nga iyang gisumbong.

Nagbahas-bahas ang kapulisan hangtod nga ilang nasigpatan ang mga suspek nga nagsakay og traysikad gikan sa Barangay Kamagayan mao nga nasikop. (JFT)