ANG Davao City Council nagplano karon nga amendahan ang ordinansa sa dakbayan nga nagdili sa pagpanigarilyo sa mga dapit publiko.

Tumong sa konseho, sumala ni Konsehal Peter Lavi¤a, trade committee chair sa konseho, mao ang pagpalapad pa sa ordinansa pinaagi sa pagdili sa mga cigarette vendors sa pagpamaligya sa mga sidewalks ug sa mga kadalanan.

Matud ni Laviña nga buot nilang pabug-atan pa ang karong ordinansa tungod kay ilang namatikdan nga dugang mga tawo, kadaghanan mga batan-on nakakat-on nga manabako.

Sumala ni Laviña nga ubos sa gisugyot niya nga kausaban sa ordinansa, idili usab ang pagpamaligya og menudo nga sigarilyo.

Ang siyudad nagpasar sa Davao City Comprehensive Anti-Smoking Ordinance No. 043-02 niadtong 2002. Human gipahamtang ang ordinansa dinhe sa siyudad, daghan ang nasikop ug gikiha sa hukmanan. Daghan ang nagbatun og criminal record tungod lamang sa paglapas sa ordinansa.

Ang pagpanigarilyo dili maayo--dili maayo sa bulsa ug labaw nga dili maayo sa lawas. Daghang mga tawo ang nangamatay tungod sa kanser sa baga, usa ka sakit nga gituohang nahimo tungod sa pagpanabako.

Magpahiling ka sa doktor, usa niadtong itambag kanimo sa mananambal mao ang pag-undang sa pagpanabako.

Daghang mga naadik sa pagpanabako ang miundang na tungod kay dunay lahi nga gibati sa lawas.

Apan samtang daghang mga 'smokers' ang miretiro, dunay mga batan-on nga nagsugod na og tilaw sa sigarilyo.

Ang pag-ban sa sigarilyo sa mga dapit publiko usa ka maayong lakang sa kagamhanan sa siyudad. Makatabang kini sa pagpanalipod sa kahimsog sa katawhan. Apan maayo kaha ang laraw karon ni Laviña nga did-an ang mga vendors sa pagpamaligya niini sa mga sidewalks ug kadalanan?

Piho nga mangasuko ang mga vendors niining gisugyot nga lakang ni Lavi¤a tungod kay kulob ang ilang mga kaldero!

Siguradong mangutana ang mga vendors niini-- "nganong kami man ang tirahon?"

Tuod, nganong dili ang tobacco industry maoy banatan ni Konsehal Laviña?

Mura man gud ni og sugal nga 'last two'. Bisan og unsaon sa mga otoridad paggukod sa maong ilegal nga sugal dili kini masanta samtang dunay lotto ug padayon ang gobyerno sa pagpasugal.

Sa sigarilyo, samtang itugot ang pagpamaligya dinhi og sigarilyo, duna gyud magpalusot.

Nagtuo kaha si Konsehal Lavi¤a nga kanang mga vendors og mga pagkaon ug dry goods diha sa dalan di mamaligya, sa tago nga paagi, og sigarilyo? Maayo og duna kita'y daghang pulis nga magbantay nila.

Siguro ang maayo nga pahugtan lang ang pagpatuman sa ordinansa nga nagdili sa pagpanabako sa mga dapit publiko apan pasagdan ang mga vendors nga mamaligya sa sigarilyo tungod kay panginabuhi kini.

Bisan ang gobyerno wala magtak-op sa pabrika sa sigarilyo sa kahadlok nga mawad-an kini og kitaon gikan sa buhis ug makulob ang daghang mga kaldero. Lisud ang panginabuhi karon, busa hinay-hinay lang kita.