USA ka lalaki ang napalgan na lamang nga wa nay kinabuhi samtang naglunang sa iyang kaugalingong dugo ug nagbuy-od sa provincial road didto sa Barangay crossing Hagonoy, Davao del Sur.

Nakadawat og text message ang kapulisan mga alas 11 sa gabii niadtong Enero 2 nga nagkanayong dunay wa mailhing lalaki ang nakita nga naghigda sa dalan.

Si Police Officer 2 Mario Olegario nagbutyag nga ang biktima naligo na sa iyang kaugalingong dugo dihang ilang nakita.

Apan way si bisan usa nga nakaila sa maong lalaki didto sa lugar. Wala say nakitang bisan unsang identification cards nga moila sa biktima.

Saysay sa kapulisan nga may dala nga bag ang biktima nga may sulod nga jacket, brief ug kalo.

Nakita sab sa mga imbestigador ang 6 ka mga baseyong bala sa kalibre .45 diin nagkatag dapit sa gihigdaan sa biktima.

Di pa masuta sa otoridad kung nganong gipusil patay ang maong lalaki.

Bisan ang grupo sa mga batan-on nga maoy unang nakaagi sa biktima wa gyud makaila kaniya hinungdan nga nidangop sila ngadto sa kapulisan.

Gitakdang dalhon sa mga imbestigador ang mga ebidensyang ilang nakuha gikan sa crime scene ngadto sa Philippine National Police crime laboratory aron tun-an.

Gidala na sa punerarya ang patay'ng lawas sa maong tawo aron ipailawom kini sa otopsiya, samtang nanukad ang kapulisan sa pagsulbad sa krimen ingon man ang pag-ila kung kinsa ang biktima.(Orlando B. Dinoy)