ANG ikalima ka buwan nga kasumaran sa Maguindanao massacre gisaulog sa mga sakop sa media, mga abogado ug relihiyosong pundok didto sa Centennial Park niadtong Biyernes.
Ang kasaulogan gisugdan sa pag-ampo, film viewing, pagdagkot og sulo ug kandila, ug pasundayag sa mga kabataan kinsa pulos gitaptapan ang mga mata ug dunay dugo ang ilang mga bisti nga nanghigda sa kalsada daw gipangmasaker.
Mga misalmot sa maong kalihukan nagkahiusa sa pagpangita og hustisya sa mga nangamatay ug nanghimaraot sa desisyon ni Department of Justice acting secreatay Roberto Agra nga mibasura sa kasong murder ni Autonomous in Region Muslim Mindanao governor Zaldy Ampatuan ug Mamasipano Mayor Akmad Ampatuan Sr.
Sila Zaldy ug Akmad apil sa amahan ug anak nga Andal Sr. ug Andal Jr. nga mga nag-unang suspetsado sa pagmasaker sa 57 ka mga tawo didto sa Barangay Salman, Ampatuan, Maguindanao niadtong Nobyembre 23, 2009.
Si Attorney Carlos Isagani Zarate, secretary general sa Union of People's Lawyers in Mindanao (UPLM), namahayag nga ang pagbasura ni Agra sa kaso nila Zaldy ug Akmad usa ka pagbudhi sa katawhan kinsa nangita og hustiya sa kamatayon sa mga biktima.
"His callous and shameless decision to drop suspended Armm Governor Zaldy Ampatuan and Mayor Akmad Ampatuan Sr. from the multiple murder charges is nothing but a cruel betrayal of the quest for justice fot the senseless death of 57 inocent lives, including of our own UPLM founding member, Attorney Connie Brizuela," ni Zarate sa ilang suwat pamahayag.
Mga biktima igo lang miuban sa kabanay ni Buluan Vice Mayor Ismael "Toto" Mangudadatu sa paghatud sa certificate of candidacy sa bise mayor kinsa nagpapili isip gobernador sa Maguindanao.
Si Zarate nanawagan sa tanang sakop sa hudikatura ilabi na ang mga huwes nga maoy naggunit sa kaso sa banay sa mga Ampatuan nga ipakita ang ilang independensiya sa executive department. (AD)