GIBATIKOS sa militar ang mga rebeldeng New People's Army (NPA) gumikan sa pagpatay sa 83 sa ka mga inosenteng tawo dinhi sa Habagatang Mindanao sa tuig 2009.
Sa talaan sa 10th Infantry Division sa Philippine Army, miabot na sa 83 ka mga tawo ang gipatay sa nga rebeldeng grupo nga gipangulohan ni Leoncio Pitao alyas Kumander Parago.
"The reported 79 people killed by NPA terrorists in Southern Mindanao region climbed to 83 at yearend," suma ni 10th Infantry Division Public Affairs Office chief Captain Emmanuel Garcia sa usa ka suwat pamahayag nga gipadangat sa Superbalita.
Kahinumdoman, unang talaan nga gipaguwa sa militar nagpakita nga sugod niadtong Enero 3 hangtud Disyembre 17, 2009, dunay 79 ka mga tawo ang gipamatay. Apan, dunay gipangpatay ang nadugang sa ilang talaan gikan niadtong Disyembre 21 hangtud 28, 2009.
Nadugang sa mga gipamatay mao sila Teofilo Bugcal Lerita, taga Sitio Crossing, Barangay Malabog, Paquibato District kinsa gipatay sa mga tawo nga nagtakuban nga sundalo nga nagsul-ob og uniporme sa Task Force Davao niadtong Disyembre 21.
Laing namatay mao si Cipriano Albores kisan gipusila patay sulod sa iyang pinuy-anan didto sa Sitio Tungan, Barangay Kinangan, Malita, Davao del Sur niadtong Disyembre 28.
Laing duha ka mga biktima ang nadugang sa listahan sa militar human napamatud-an sa nga nalambigit ang mga
rebelde sa ilang kamatayon.
Nadugang mao si Jaime Villafani, usa ka sakop sa paramilitary sa Purok 6, Barangay Mangayon, Compostela, Compostel Valley Province. Siya gipatay sa mga armadong tawo nga nagsakay og motorsiklo niadtong Disyembre 5.
Samtang ang ikaduha mao si Kagawad Benafloro Peladas kinsa gipatay sab didto sa Sitio Quibato, Barangay Dominga, Calinan District niadtong Disyembre 8.
Si Garcia nagbutyag nga daghan pa ang mga gipamatay sa mga rebelde sulod lamang sa tuig 2009 ang padayong giimbestigahan mga otoridad.
Ang militar nagbutyag nga ang presensiya sa mga rebelde sa kabukiran maoy hulga sa kalamboan sa nasud. (AD)