Maayong kiay-kiay sa 16 anyos dihang giduslak

HUMAN sa kalipay nga gibati samtang nagsayaw og "Budots Dancing" kauban ang mga higalang babaye, kamatayon ang naangkon sa usa ka menor de edad nga lalaki kagahapon sa kaadlawon didto sa Bonguyan Beach Resort, Times Beach, Barangay Matina Aplaya, siyudad sa Davao.

Napalgan nga wala nay kinabuhi sa alas 12:50 sa kaadlawon duol sa kanhi Iril-Iril Resto Bar mao si Erick Lucena, 16, nagpuyo sa Phase 2, NHA Relocation, Bangkal, Barangay Talomo.

Ang spot report sa Talomo Police Station nagpahibalo nga ang biktima napalgan nga nagkadugo sa ngit-ngit nga lugar sa maong beach resort sa mga sakop sa Task Force Davao.

Ang grupo sa Task Force Davao nagpatrolya sa maong lugar apan nakasiplat sila og pundok sa mga batan-ong nga nagkagubot mao nga ila kining gisusi ug didto ilang napalgan ang biktima nga nagkadugo.

Si Muelan nagpahibalo dayon sa Central 911 aron dalahon ang biktima sa tambalanan apan ang mga paramedics nga miresponde sa maong krimen nagsulti nga dead on the spot ang biktima.

Si Lucena nakaangkon og duha ka mga samad sa iyang tuong ilok nga maoy hinungdan sa iyang kamatayon.

Sa gihimong imbestigasyon sa kapulisan, walay bisan usa ka tawo nga nakakita dihang gidunggab ang biktima kinsa giingon nga igo lang nagsayaw-sayaw sa maong lugar sa wala pa siya namatay.

Mga molupyo sa maong lugar nagtuo nga gipatay ang biktima sa mga batan-ong nga nasuko kaniya samtang nagsayaw sa Budots Dance sa maong lugar.

Ang biktima atua karon gihaya sa Angel Funeral Homes sa dalang F. Torres samtang ang kapulisan nagsusi aron sayron kung unsa ang motibo ug kisan ang mipatay sa biktima.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph