NALASLAS ang nawong sa usa ka dalaga human giluba ug gitulis kagahapon mga alas 5:50 sa buntag sa Kauswagan ning siyudad sa Cagayan de Oro.
Nagkadaiyang samad dinunggaban sa lain-laing parte sa lawas ang naangkon ni Gina Pamisaran, 21, taga Mulawan, Patag ning siyudad human gitulis sa wala mailang suspetsado.
Nasayran nga gikan pa nag-off sa iyang trabaho ang biktima ug hinay nga nagbaklay aron maghulat og dyip dihang giduolan sa wala mailang lalaking armado og kutsilyo.
Gitionan og kutsilyo ang liog sa biktima hinungdan usab sa pagpanglagom niini ug nideklara og tulis.
Nisuway pa sa pakigbugno ang biktima apan pakyas dihang giluba ang nawong sa biktima ug gilaslas kini nga nilapos ang samad sa ilong nga bahin.
Nakuha sa tulisan ang iyang bag nga adunay mga sulod importanteng dokumento ug kwarta nga wala matino ang kantidad.
Human nakuha ang tinguha dali nga misibat ang suspek agi sa wala matinong direksiyon. Gibyaang nagkasamad-samad ang nawong sa biktima mao nga nagpatabang kini og gidala sa Northern Mindanao Medical Center (NMMC).
Sa pagsulat ning balita padayon pang giatiman sa mga doktor si Pamisaran sulod sa balay-tambalanan apan giklarong luwas na kini sa kritikal nga kondisyon.
Namatikdan ang sunod-sunod nga pagpanulis nga natigayon ning siyudad, kasagaran biktima madala sa tambalanan tungod kay giluba sa suspek. (SVB)