DUHA ka mga habal-habal driver ang gipamusil ug gikarnap pa ang motorsiklo diin usa niini nakabsan sa kinabuhi.
Nilapos ang bala sa mata ni Rolando Oclarit, 28, minyo, taga Zone-12, Carmen ning siyudad, usa ka habal-habal driver human gipusil niadtong Sabado mga alas 3:00 sa hapon sa Buena Oro ning siyudad.
Patay diha dayon ang biktima nga gibiyaan sa wala mailang mga suspetsado nga sakay usab sa motorsiklo niadtong tungora.
Si PO3 Melchor Tacna sa Police Station 4 (PS4) sa Carmen nibutyag sa Sun.Star Superbalita nga naabtan na lamang nila sa kasagbutan nga bahin si Oclarit nga wala any kinabuhi ug adunay pinusilan sa likod sa ulo nga bahin nga nilapos sa mata.
Gituohang pipila na ka oras ang nilabay human sa pagpangluthang tungod kay gahi na man ang dugo sa biktima dihang naabtan sa kapolisan.
Matud ni Tacna nga karnap ang posibleng motibo sa pagpamusil tungod kay ang asawa sa biktima nibutyag nga namasayro ang iyang bana gamit ang ilang Honda XRM motorsiklo kolor blue niadtong higayona.
Wala na usab nakuha sa mga polis ang motorsiklo niini nga gigamit sa pagpamasayro.
Dugang sa asawa nga walay kaaway ang iyang bana ug buotan nga tawo. Bisan ang mga kauban niining mga habal-habal driver niingon nga buotan ug nagpokos sa pagpanginabuhi ang biktima.
Ang PS4 padayon pa sa paghimo og dugang imbestigasyon kalabot sa insidente labina nga bag-ohay lang usa gihapon ka habal-habal driver ang gigulgol ang liog ug namatay human gikarnap usab ang motorsiklo.
Samtang sa laing bahin, kritikal ang kondisyon ni Bryan Nacario, 29, minyo, taga Zone-7, Kauswagan ning siyudad, human gipusil ug gikarnap pa ang motorsiklo kagahapon mga alas 3:10 sa kadlawon sa Barangay Consolacion ning siyudad.
Nasayran nga usa ka pasahero ang nigpara sa biktima gikan sa Burgos nga bahin ug nagpahatod sa Consolacion.
Paghidangat sa Consolacion kalit lang nga giposposan ang biktima og pistola human gipusil pa ang iyang likod nga bahin nga nilapos sa tiyan, naigo usab ang nawong sa biktima nga nilapos ang bala sa dalunggan.
Nadala sa wala mailang suspetsado ang motorsiklo ug gibyaan nga nagubuy-od ang biktima sa dalan.
Usa ka barangay kagawad sa maong dapit ang nakaresponde sa biktima ug daling nidala niini sa Northern Mindanao Medical Center (NMMC).
Kritikal ug anaa sa operating room ning panahona ang biktima.
Ang kapolisan sa Police Station 5 (PS5) sa Macabalan padayon pa sa pag-imbestigar sa kaso.
Ang kapolisan nipahimangno ngadto sa mga habal-habal driver nga kung mahitabo ang susama niini, dili na lamang ihikaw ang motorsiklo aron dili mamatay ug makig-coordinate dayon sa kapolisan. (SVB)