ANAK ug inahan ang pulos nasunog human nabuthan og pabuto atol sa pagtabo sa bag-ong tuig niadtong Disyembre 31 tuig 2009 mga alas 7:30 sa gabii.
Diha-diha nga nakabsan sa kinabuhi sila si Jocelyn Amoroto-Guibone ug 5 anyos nga anak niini nga si Joross dihang niulbo ang gipanag-iyahan nga stall nga puno sa baligya sa pabuto sa Trinidad Baol St., Barangay 22A siyudad sa Gingoog.
Sa gihimong pakighinabi sa Sun.Star Superbalita ngadto kang PO2 Ismael Virgil Gundaya sa Gingoog Police Station gisaysay niini nga namaligya pa ang pamilya niadtong tungora dihang ang bana nga si Adonis nisuway sa pagpabuto og usa ka silver star mga 9 metros ang kalay-on gikan sa ilang stall.
Tungod niini mikaylap paingon sa ilang stall ang siga gikan sa pabuto hinungdan nga kini sunog ug nag-iyahay og panagan ang magtiayon.
Dihang nahinumduman ni Jocelyn nga anaa sulod sa stall ang iyang 5 anyos nga anak nga natulog niadtong tungora nibalik kini ug gikuha apan nangbuto na ang sulod sa maong mga stall diin pulos pabuto ang sulod hinugdan nga wala na naluwas ang inahan ug anak.
Hinuon, wala na nikaylap sa laing stall ang maong sunog tungod kay deretso sab nga nakabantay ang ubang mamaligyaay niadtong tungora ug gisirad-an ang ilang mga stall.
Sunog ug dili mahitsura ang lawas sa duha ka mga biktima dihang dali nga girespondihan sa mga sakop sa Bureau of Fire Protection.
Gibana-banang mokabat ngadto sa P400 mil ang danyos sa sunog.
Matud ni Gundaya nga pagbasol sa kaugalingon ang gibati sa amahan ning panahona.
Sa pagsulat ning balita, gihaya pa sa puloy-anan ang patayng lawas sa Barangay 18, susamang siyudad.